Гэр хорооллын төлөвлөлтийг эхлүүлэх зарим байршлыг тогтоох тухай асуудлыг НИТХ-ын төлөөлөгч, нийслэлийн Засаг даргын Хот байгуулалт,хөрөнгө оруулалтын асуудал эрхэлсэн орлогч С.Очирбат Тэргүүлэгчдэд танилцууллаа. Өнөөдрийн байдлаар УБ хотод 184,2 мянган айл өрх гэр хороололд байгаа бөгөөд эдгээр өрхүүд сургууль, цэцэрлэг, эмнэлэг гээд нийгмийн дэд бүтцээс алслагдсаны дээр агаарын бохирдлын 70 хувь нь гэр хорооллоос үүдэлтэй байна гэж тэрээр хэллээ. Тиймээс гэр хороололд дахин төлөвлөлт хийж инженерийн шугам сүлжээнд холбон барилгажуулах ёстой гэж үзэж байна. Гэр хорооллын дахин төлөвлөлт хийгдсэнээр эхний ээлжинд 42 мянган айл өрх инженерийн байгууламжид холбогдож, хотын агаарын бохирдол 30 хувиар буурах юм. Гэр хорооллын газрыг 3 хэсэгт бүсчилэн төлөвлөхөөр зураг төслийг боловсруулсан байна. Эхний ээлжийн төлөвлөлтөд Ханын материал орчмын 130 га газар, СХД-ийн 10-р хороо Баянхошуун дахь хуучнаар Арьс ширний 60 айлд буй 120 өрх айл, СБД-ийн 15-р хороо Дамбадаржаагийн 58-р сургуулийн орчмын 189 айлыг хамруулсан төлөвлөлт хийхээр урьдчилсан байдлаар зураг төслийг боловсруулжээ. Мөн ЧД-ийн 72-р сургууль орчмын 15 га газарт 115 айл өрх, ЧД-ийн 7-р хорооны 11 га талбай, БЗД-ийн 8, 16-р хорооны 691 айл өрх гээд шинээр 7 өмнө төлөвлөгдсөн 5 нийт 12 байршилд дахин төлөвлөлт хийж 4-р сараас эхний ажил эхэлнэ гэж Нийслэлийн Засаг даргын Хот байгуулалт хөрөнгө оруулалтын асуудал хариуцсан орлогч С.Очирбат НИТХ-ын Тэргүүлэгчдэд танилцууллаа.
2013 онд НИТХ гэр хорооллын дахин төлөвлөлтөнд зориулж 40 тэрбум төгрөг батласан бөгөөд гэр хорооллыг дахин төлөвлөхдөө хувийн хэвшлийнхэн болон хөрөнгө оруулагчдад санал тавьж хамтарч ажиллах юм. Гэр хорооллын төлөвлөлтийн ажлыг шинээр байгуулагдаж буй “Гэр хорооллын хөгжлийн газар”, “Гэр хорооллыг орон сууцжуулах төсөл” Улсын үйлдвэрийн газар гэсэн 2 газар гардан зохион байгуулах юм. НИТХ-ын Тэргүүлэгчид гэр хорооллыг дахин төлөвлөхдөө ирээдүйд хийгдэх дэд бүтцийн ажлыг бодолцож төлөвлөлтөө хийхийг сануулж байлаа. Ингээд НИТХ-ын Тэргүүлэгчид энэ асуудлыг хэлэлцээд Нийслэлийн Иргэдийн Төлөөлөгчдийн Хурлын ээлжит хуралдаанаар хэлэлцүүлэхээр тогтлоо. Мөн НИТХ-ын ээлжит 7 дугаар хуралдааныг 2013 оны 1 дүгээр сарын 31-ний 09:00 цагаас хуралдуулахаар боллоо гэж Нийслэлийн Хэвлэл мэдээлэл олон нийттэй харилцах хэлтсээс мэдээллээ.
