Монгол Улсын Үйлдвэр, хөдөө аж ахуйн дэд сайд Ц.Туваан тэргүүтэй төлөөлөгчид 01 дүгээр сарын 31-ээс 02 дугаар сарын 03-ны өдрүүдэд ХБНГУ-д ажлын айлчлал хийж байна. Төлөөлөгчид өчигдөр ХБНГУ-ын Хүнс, ХАА, хэрэглэгчдийн эрх ашгийг хамгаалах яамны Парламентын Төрийн нарийн бичгийн дарга ноён Герд Мюллертэй уулзав.
Уулзалтанд монголын талаас Үйлдвэр хөдөө аж ахуйн дэд сайд Ц.Туваан, тус яамны Газар тариалангийн газрын дарга Ц.Рэнчинсэнгээ, Малын удмын сангийн үндэсний төвийн захирал Д.Цолмон, Гадаад хамтын ажиллагааны хэлтсийн мэргэжилтэн Б.Биндэръяа, Монгол Улсаас ХБНГУ-д суугаа онц бөгөөд бүрэн эрхт элчин сайд Б.Даваадорж, ЭСЯ-ны худалдаа, эдийн засгийн атташе Ц.Энхсайхан нар оролцов.
Уулзалтын үеэр дэд сайд Ц.Туваан ХАА-н салбар нь Монгол Улсын эдийн засгийн хөгжлийн нэг тулгуур багана болохыг цохон тэмдэглээд Шинэчлэлийн засгийн газраас баримталж буй хүнс, ХАА-н салбарын бодлогыг танилцуулж, аж үйлдвэр, хөдөө аж ахуйн чиглэлээр өмнө эхлүүлсэн хоёр орны харилцаа, хамтын ажиллагааг өргөжүүлэх хүсэлтээ илэрхийлэв.
