Монгол Улсаас тус улсад суугаа Онц бөгөөд Бүрэн Эрхт Элчин сайд Б.Дэлгэрмаа, Гадаад харилцааны дэд сайд Д.Ганхуяг, Сингапурын Бизнесийн Холбооны Үйл ажиллагаа хариуцсан захирал ноён В.Тай нар чуулга уулзалтыг нээж хэлсэн үгэндээ энэхүү форум нь хоёр орны эдийн засаг, бизнесийн хамтын ажиллагаа өргөжин хөгжих, хот байгуулалт, төлөвлөлт, аялал жуулчлалын салбарт хамтын ажиллагаа бий болгох, харилцан туршлага солилцох зэрэг олон талын ач холбогдолтой болохыг онцоллоо.
Мөн Дэд сайд Д.Ганхуяг, Элчин сайд Б.Дэлгэрмаа нар Монгол Улсын эдийн засгийн өнөөгийн байдал, цаашдын төлөв, хөрөнгө оруулалтыг нэмэгдүүлэхэд Засгийн газраас баримталж буй бодлого, зорилтот хөтөлбөрүүдийн талаар төлөөлөгчдөд танилцуулав.
Монгол, Сингапурын төр, хувийн хэвшил, бизнесийнхний 140 гаруй зочид төлөөлөгч оролцсон уг форум нь манай улсын дэд бүтэц, аялал жуулчлал, эрүүл мэнд, барилга, хот байгуулалтын салбарт төрөөс баримталж буй бодлого, хууль эрх зүйн зохицуулалтын талаар танилцуулж, энэ чиглэлээр хөрөнгө оруулалт татах, туршлага солилцох, эдгээр салбарт Сингапурын сонирхлыг бий болгох, хоёр орны бизнес эрхлэгчдийг холбох зэрэг зорилтууддаа хүрч чадсан арга хэмжээ боллоо.
