Ардчилсан орнуудын хамтын нийгэмлэгийн сайд нарын VII  бага хурал Улаанбаатар хотноо зохион байгуулагдах болсонтой холбогдуулж нийслэл хотод тохижилтын ажил ид өрнөж байна. Энэхүү тохижилтын ажлын хүрээнд нийслэл хот дахь хөшөө, дурсгалыг сэргээн засварлаж байгаа.  Харин энэхүү ажлыг зарим хэвлэл мэдээллийн хэрэгслээр буруу тайлбарлан, Ю.Цэдэнбал агсны хөшөөг буулгаж байна гэх утгатай ташаа мэдээлэл олон нийтэд цацжээ. Тиймээс хөшөөг бүтээсэн уран баримлач, төрийн соёрхолт Л.Ганхуягаас зарим зүйлийг тодрууллаа.


-Та Ю.Цэдэнбал агсны хөшөөг босгосон хүн. Тэгэхээр энэхүү хөшөөг анх хэдэн онд бүтээсэн юм бэ?

-Одоогоос 6-7 жилийн өмнө энэхүү хөшөөг босгосон юм. Тухайн үед өвөл байсан болохоор хавар газар гэсэх,  өвөл болохоор буцаад хөлдөх зэргээс болж хөшөөнд суулт өгч, суурийн чулууны зарим хэсгүүд нурж, аюултай байдалд орсон юм.  Тиймээс Улаанбаатар хотын Захирагчийн ажлын албанаас хөшөөний суурийг сэргээн засварлаж, бэхэлгээ төмрийг бетондож бэхжүүлэхээр хөшөөг түр буулгаад байна. Түүнээс биш хөшөөг бүрмөсөн буулгаж, нурааж байгаа юм огт байхгүй.

-Хөшөөний суурийг сэргээн засварлаж хэзээ дуусгах вэ?

-2-3 хоногийн хугацаанд засч, бэхлээд хөшөөгөө буцаагаад сууринд нь байрлуулахаар бид ажиллаж байна.  Ардчилсан орнуудын хамтын нийгэмлэгийн сайд нарын VII бага хурлаас өмнө тохижилтын ажлыг дуусгах учиртай.