Увсчууд архигүй тамхи аймаг болохыг зорьж байгаа. Аяны хүрээнд орон нутгийн телевизүүдээр  шторк цацаж, айл өрхүүдээр дөрвөн  төрлийн 3000 орчим гарын авлага тараасанаас гадна байгууллагууд архи, тамхины эсрэг сурталчилгааны материал, ухуулах хуудас, лоозон бэлтгэсэн байна.

  Монгол Улсын Үндсэн хууль, Тамхины хяналтын тухай хууль, Архидан согтуурахтай тэмцэх тухай хууль, Хүүхдийн эрхийг хамгаалах тухай хуулийн хэрэгжилтийг хангах, өсвөр үе залуучуудыг хорт зуршил, гэр бүлийн хүчирхийллээс урьдчилан сэргийлэх, нийт иргэдэд архи тамхигүй иргэн айл өрх, хамт олны үлгэр дууриалалыг зарлан тунхаглах, сурталчлах, эрүүл зан үйлийг төлөвшүүлэхэд түлхэц өгсөн арга хэмжээ болсныг мэргэжлийн байгууллагууд онцолж байлаа.

Аймгийн хүүхдийн нэгдсэн зөвлөлийн гишүүн сурагчид, албан байгууллагын залуучуудын төлөөлөл, төрийн бус байгууллагын төлөөллүүд САМА телевизийн “Ярилцах цаг”  шууд нэвтрүүлэгт оролцож ард иргэд, үе тэнгийнхэндээ архи, тамхины хор уршгийг сурталчилан таниулж, жагсаалт идэвхитэй оролцож, архи тамхинаас татгалзахыг уриалсан байна.

“Архи,тамхигүй Монгол хүн” нийтийг хамарсан жагсаалд аймгийн Засаг дарга Д.Цэндсүрэн оролцож “Хүүхдийн төлөө ЗА гэж хэлцгээе” хэмээн архи, тамхинаас татгалзахаа амласан. Үүний дараа олон хүмүүс архи, тамхи дахин хэрэглэхгүй гэдгээ бяцхан үрсдээ амлан, илэрхийлж байсан.

Улаангом суманд зохион байгуулсан уг жагсаалд 60 гаруй төрийн болон төрийн бус байгууллага, аж ахуйн нэгжийн 3000 орчим хүн, бусад 18 суманд явагдсан жагсаалд 3600 орчим хүн, нийт аймаг даяар 6600 орчим хүн хамрагдаж Архи тамхинаас татгалзсан.