Эрүүл мэндийн сайд Н.Удвалын дэмжлэгтэйгээр, Эрүүл мэндийг дэмжих сангийн санхүүжилтээр хэрэгжсэн “Цахим доктор” төслийн бүрэлдэхүүн болох www.iDoctor.mn вэб сайт өнөөдөр нээлтээ хийж, аймгуудын эрүүл мэндийн газар, нэгдсэн эмнэлгүүдийн удирдлагуудад танилцууллаа.
Иргэд эрүүл мэндийн талаар мэдээ, мэдээлэл дутмаг байдгаас дур мэдэн эмчилгээ хийлгэх, эмчийн жоргүйгээр эм уух, ам дамжсан сургаар эмчилгээ хийлгэх, эрүүл мэндийн байгууллага, эмчилгээ, үйлчилгээний тухай нэгдсэн мэдээллийн хаанаас авахаа мэдэхгүй байдгаас болж олон сөрөг үр дагавар гарах болсон. Тиймээс эл байдлыг арилгаж, иргэдийн эрүүл мэндийн боловсролыг дээшлүүлэх, мэдлэг, мэдээлэл өгөх зорилгоор энэхүү цахим хуудсыг нээх болсноо төслийн багийнхан хэлэв.
Мэдээ, мэдээлэл, видео, асуулт хариулт, миний түүх, эмч, эксперт, сайтын бүтэц, эрүүл мэнд, эм бэлдмэл, өвчин эмгэг, лавлагаа, нийтлэл, эрх зүй, бүтээгдэхүүн зэрэг нийт 16 үндсэн цэстэй. Бүх насныханд зорилусан уг вэб сайтыг айфон, андройд гар утас, айпад хувилбараар үзэх боломжтой ажээ.
Энэхүү сайтаар дамжуулан Эрүүл мэндийн сайд уншигчдын асуухыг хүссэн асуултад долоо хоног бүр хариулж байх юм байна. Мөн эмч, мэргэжилтнүүд зөвлөгөө өгөх, хэлэлцүүлэг өрнүүлэх болон өвчин эмгэгээс хэрхэн урьдчилан сэргийлэх, өвчилсөн үед авах арга хэмжээ, эмнэлэг, эмийн сангуудын байршил, цагийн хуваарь, эм, бэлдмэлийн талаарх нарийн мэдээллийг авах, гэнэтийн тохиолдолд үзүүлэх анхны тусламжийн тухай видео хичээлүүд зэрэг эрүүл мэндийн талаарх бүхий л мэдээ, мэдээллийг нэг дороос авах боломжтойгоороо бусад вэб сайтуудаас онцлогтой.
www.iDoctor.mn вэб сайтыг нэг жилийн турш бүтээсэн бөгөөд төр хувийн хэвшлийн 10 гаруй байгууллага хамтран ажиллаж, сайтын мэдээллийн санг бүрдүүлжээ. Уг нээлтийн үеэр тус сайтын мэдээллийг улам болосронгуй болгох, мэдээллийн санг баяжуулахад эрүүл мэндийн чиглэлээр үйл ажиллагаа явуулдаг бүхий л байгууллага, аж ахуй, нэгж, хувь хүмүүстэй хамтран ажиллахад бэлэн байгаагаа төслийн багийнхан илэрхийлж байв. “Цахим доктор” төслийн талаарх илүү дэлгэрэнгүй мэдээлэл авахыг хүсвэл 99104458, 70104458 дугаарыг утсаар холбогдох боломжтой.
