Монгол Улсын Ерөнхий сайд Ч.Сайханбилэг Монгол Улсын Ерөнхийлөгчид Засгийн газрын гишүүнд нэр дэвшиж буй хүмүүсийг танилцуулах зөвшилцөх уулзалтын үеэр Монгол Улсын Ерөнхийлөгч Ц.Элбэгдоржийн хэлсэн үгийг хүргэе.
Тэрээр, “Монгол Улсын Засгийн газрын гишүүнд нэр дэвшигчдийн энэ оройн амгаланг айлтгая. Та бүхэн улс орныхоо эрх ашгийг бодож, тулгамдаж байгаа асуудлын нөхцөл байдлыг сайн ойлгож, хамтарч ажиллахаар улс төрийн шийдвэр гаргаж орж ирсэн гэж би үзэж байна.
Энэ Засгийн газарт онцлог бий. Сонгуулийн дараа байгуулагдаж байгаа Засаг биш тул, шинээр байгуулагдаж байгаа Засгийн газар шиг 100 хоног гэх зэрэг тодорхой шатлалтай ажиллах хугацаа та бүхэнд байхгүй. Нэг талаас оны төгсгөл болж байна. Удахгүй шинэ жил, оны дараа цагаан сар гэх маягаар харж ажиллах хугацаа байхгүй. Нэг үгээр хэлбэл амрах, ажил цалгардуулах хугацаа та бүхэнд үлдээгүй. Тийм Засгийн газар гэж харж байгаа.
Хэлэх гэсэн хоёр дахь зүйл бол Засгийн газрын зүгээс тулгамдсан асуудлыг эрчимтэй, зоригтой, хурдтай шийдэж ажиллахыг бүх талаар дэмжиж ажиллана.
Бид Засгийн газар байгуулж, янз бүрийн нөхцөлд ажиллаж байсан учраас сайныг бодож мууг нь анхааруулах үүрэгтэй. Анхаарах шаардлагатай асуудлуудыг хэлэхээс өөр арга байхгүй. Хуулийг дээдэлж, ёс зүйтэй,хариуцлагатай ажиллах ёстой. Засгийн газрын гишүүн боллоо гээд амьдралаа өөд татах, ар гэр, хажуудаа байгаа найз нөхдөө өөд татах, нам, хамт олноо харж үзэх зэрэг хууль зөрчсөн, авлигын шинжтэй үйл ажиллагаанд оролцохыг хэрхэвч тэвчихгүй. Үүнийг эхнээс нь хэлэх ёстой. Засгийн газар байгуулагдлаа гээд очоод янз бүрийн халаа солио хийх, ялангуяа мэргэжлийн, ажлаа сайн хийж байгаа хүмүүс дээр халаа сэлгээ хийх үйл ажиллагаа ерөөсөө байж болохгүй.
Сүүлийн жилүүдэд төрийн, Засгийн газрын хэмжээ томорсон. Би Ерөнхий сайд Ч.Сайханбилэгт үүнийг багасгаж чадах байх гэж найдаж байна. Томруулдаг хүчин зүйлүүдийг алга болгодог санаачлагуудыг УИХ-д маш хурдан хугацаанд оруулж шийдүүлэх байх аа гэж бодож байгаа. ДНБ-д Засгийн газрын эзэлж байгаа зардлын хэмжээг асар багасгах хэрэгтэй. Үүн дээр хамгийн эрчимтэй амжилт гаргасан Засгийн газар болоосой гэсэн хүсэлт байна.
Өмнө нь ч хэлж байсан. Энэ Засгийн газар бол улс төр бодох, дараагийн сонгууль бодох эрхгүй Засгийн газар юм. Үнэхээр тулгамдаж байгаа асуудлаа аваад үзэхэд асар их ажил бий. Тийм учраас энэ бүхнийг харж, ухамсарлаж, Ерөнхий сайдын саналыг хүлээж авч энэ сонголтыг хийж байгаа гэж би ойлгож байна.
Үнэхээр Монголын төлөө хэцүүг үүрч, хүнд асуудлыг шийдвэрлэж, өөрсдийгөө золиослон байж үлдсэн нэг жил, зургаан сарын хугацаанд, дараагийн сонгуулиар бүрдэх Засгийн газрыг бүрдтэл ажиллах ийм л итгэл төгс хүмүүс орж ирж байна гэж харж байгаа.
Миний Ерөнхий сайдад хэлж байсан өмнөх байр суурь хэвээрээ. Засгийн газрыг гаднаас, мэргэжлийн, чадварлаг, ёс зүйтэй ажиллаж чадах хүмүүсээс бүрдүүлэх ёстой. УИХ-ын гишүүн хүн Засгийн газрын гишүүнийг хавсарч ажиллахыг би дэмжихгүй байгаа. Энэ байр сууриа шууд илэрхийлэх ёстой гэж бодож байна.
Намын бүлгүүдийн хувьд хамтарч ажиллана гэдэг бол энгийн зүйл. Би нэг уриалга хэлж байгаа. Энд орж ирж байгаа төлөөллийн хүмүүс нам, намынхаа бүлэг дээр, намынхаа удирдах байгууллага дээр шийдвэр гаргах ёстой. Засгийн газрыг манай нам, манай бүлгийн зүгээс, манай намын бүлэгт багтдаг гишүүдийн зүгээс огцруулах асуудлыг санаачилж тавихгүй гэсэн шийдвэр гаргах ёстой. Үлдсэн хугацаанд бидэнд үнэндээ ийм зав алга. Засгийн газар огцруулах хялбар. Эргээд байгуулахад ямар хэцүү хүндрэлтэй тулгардгийг би маш олон удаа харж байсан. Та бүхэн ч мэднэ. Хэдийгээр ийм хуулийн боломж байгаа ч гэсэн улс төрийн ийм шийдвэр гаргаж, ард олонд ойлголт өгөх юм бол энэ Засгийн газарт итгэх итгэл нь нэмэгдэнэ. Эд нар үнэхээр юм хийх юм байна. Айлтгүй урагшаа зүтгэх юм байна. Монгол Улсын өмнө тулгамдаж байгаа хүнд асуудлыг шийдэх Засгийн газар байна гэдэгт итгэх итгэл аль аль талдаа бий болно. Энэ бол их чухал шүү гэдгийг дахин хэлье.
Нэг зүйлийг бид ойлгох хэрэгтэй. Үндсэн хуулийн утга ч тэр. Нөгөө талаас ерөөсөө Засгийн газрын зарчим гэж байдаг. Энд сайдуудын өөрсдийн хэрэгжүүлэх бодлого гэж байхгүй. Монгол Улсын Ерөнхий сайдын бодлогыг тухайн салбарт хэрэгжүүлэх гэж л орж ирж байгаа хүмүүс. Засгийн газрын кабинет гэдэг бол хуралдаж мэдээллээ солилцдог зүйл гэж хуульч Б.Чимид гуай хэлдэг байсан. Түүнээс биш шийдвэр гаргаад, би санал нийлэхгүй байна гээд явдаг газар биш. Энэ асуудлыг Монгол Улсын өмнө, УИХ-ын өмнө Ерөнхий сайд хариуцдаг. Засгийн газрын гишүүд дээр хариуцлага тооцох асуудал гарах юм бол Ерөнхий сайдад л хандаж асуудал тавих ёстой. Түүнээс биш УИХ-ын гишүүд Засгийн газрын гишүүнийг огцруулна гээд бариад гүйдгээ болих хэрэгтэй. Үүнийг бүр хуулиар хааж өгөх ёстой юм. Ерөнхий сайд шаардлагатай бол оруулж ирж болно. Дахиад Засгийн газрыг бүтнээр нь огцруулах, Ерөнхий сайдыг солих боломж байхгүй гэдгийг хэлье.
Харин Засгийн газрын гишүүн ганцаараа хариуцлага алдах юм бол хариуцлага алдсан тоо бүрээр нь хариуцлага тооцдог, асуудлыг оруулж маш хурдтай шийддэг хэлбэр рүү явуулах хэрэгтэй. Ингэж чадах юм бол Монгол Улсын төрд, УИХ-д, Засгийн газарт итгэх итгэл бий болно. Хамгийн гол итгэхгүй байгаа зүйл бол хариуцлагатай холбоотой гэдгийг хэлэх нь зөв байх. Одоо Засгийн газар бүрдэж байхад итгэж найдаж байгаа хүмүүс их байгаа. Тэдний итгэл найдварыг баталгаажуулж ажиллах ёстой. Итгэхгүй, эхнээсээ дэмжихгүй хүмүүс ч байгаа. Тэдний дэмжлэгийг авч ажиллах ёстой. Аль болох тэдний дэмжлэгийг нэмэгдүүлж, “Би эхнээс нь энэ сайдын тухай буруу бодож байсан байна. Яг ажил дээр гараад ирэхэд үнэхээр юмыг хариуцсан шиг хариуцаад хийчихдэг юм байна” гэж бодтол ажиллах ёстой. Энэ бол хугацаатай ажил. Энэ хугацаатай ажил дээр янз бүрийн зүй бус, ёс бус, хууль зөрчсөн, авлига, хээл хахууль, янз бүрийн шударга бус зүйлтэй холбогдсон нэг ч мэдээлэл энэ Засгийн газраас сонсогдож болохгүй. Сонсогдоод асуудал гарах юм бол тухайн хүнтэй шууд хариуцлага тооцоод явах ёстой гэдгийг дахин давтаж хэлье” гэлээ.
