Улсын Их Хурлын 2014 оны намрын ээлжит чуулганы нэгдсэн хуралдаан өнөөдөр /2014.12.05/ 23 цаг 15 минутад эхэлж, Монгол Улсын Засгийн газрын зарим гишүүдийг томилох, үүрэгт ажлаас нь чөлөөлөх тухай Монгол Улсын Их Хурлын тогтоолын төслийг хэлэлцлээ.

Тус өдрийн үдээс хойш Ардчилсан нам болон Монгол Ардын намын Гүйцэтгэх зөвлөл, МҮАН-ын Удирдах зөвлөл тус тус хуралдаж Засгийн газрын гишүүнээр томилуулах нэр дэвшигчдээ тодруулан Монгол Улсын Ерөнхий сайдад хүргүүлсэн. Монгол Улсын Ерөнхий сайд Ч.Сайханбилэг Засгийн газрын 16 гишүүнийг томилуулах асуудлыг Монгол Улсын Ерөнхийлөгчтэй зөвшилцсөнөөр Монгол Улсын Засгийн газрын зарим гишүүдийг томилох, үүрэгт ажлаас нь чөлөөлөх тухай Монгол Улсын Их Хурлын тогтоолын төслийг Улсын Их Хурлын дарга З.Энхболдод өргөн барьсан.

Үүний дараа холбогдох Байнгын хороод хуралдаж Монгол Улсын Засгийн газрын гишүүдэд нэр дэвшигчдийг томилох асуудлыг тус тус хэлэлцэн дэмжиж чуулганы нэгдсэн хуралдаанд танилцуулахаар болсон юм.

Улсын Их Хурлын чуулганы нэгдсэн хуралдаанаар эхлээд Монгол Улсын Ерөнхий сайд Ч.Сайханбилэг Монгол Улсын Засгийн газрын зарим гишүүдийг томилуулах асуудлыг танилцуулав. Дараа нь Монгол Улсын Засгийн газрын гишүүн, Монгол Улсын Шадар сайдаар У.Хүрэлсүхийг, Монгол Улсын Засгийн газрын гишүүн, Монгол Улсын сайд, Засгийн газрын Хэрэг эрхлэх газрын даргаар С.Баярцогт нарыг томилохыг дэмжсэн тухай Төрийн байгуулалтын байнгын хорооны санал, дүгнэлтийг Улсын Их Хурлын гишүүн М.Батчимэг танилцууллаа.

Монгол Улсын Засгийн газрын гишүүн, Монгол Улсын Шадар сайдаар У.Хүрэлсүхийг томилохтой холбогдуулан  асуулт асууж, санал хэлэх гишүүд гараагүй тул нэр дэвшигчийг дэмжих санал хураалт явуулахад нэгдсэн хуралдаанд оролцсон гишүүдийн 98,3 хувь нь дэмжлээ.