Монгол Улсын Гадаад валютын албан нөөцийн (ГВАН) хэмжээ 2016 оны 11 сарын байдлаар 1,303.9 сая ам.долларт хүрч өмнөх сараас 25.5 хувь буюу 265.2 сая ам.доллараар өссөн дүнтэй байна. Гадаад валютын албан нөөц ийнхүү нэмэгдэхэд иргэд, аж ахуйн нэгжүүдийн Монголбанкинд тушаасан алтны хэмжээ нэмэгдсэн, Монгол Улсад орох гадаад валютын урсгал нэмэгдсэн нь голлон нөлөөлсөн аж.
2016 оны эхний 11 сарын байдлаар Монголбанк иргэд, аж ахуйн нэгжээс 17.6 тонн алт худалдаж авсны 14.2 тонныг буюу 80.6 хувийг мөнгөжүүлээд байна. Үүнээс зөвхөн 11-р сард 3.3 тонн буюу 132 сая ам.доллартай тэнцэх хэмжээний алтыг цэвэршүүлэн Монгол Улсын Гадаад валютын албан нөөцийг нэмэгдүүлэв.
Түүнчлэн, 2016 оны сүүлийн саруудад дэлхийн зах зээл дэх зэс, нүүрсний үнэ өссөн нь Монгол Улсад орох гадаад валютын хэмжээ нэмэгдэхэд нөлөөллөө. Эхний 11 сарын байдлаар нүүрсний экспортоос банкны системээр дамжин 495.3 сая ам.долларын орлого орсон нь өмнөх оны мөн үеэс 76 хувь буюу 214.3 сая ам.доллараар нэмэгдсэн дүн юм. Улмаар 2016 оны 11 сард төлбөрийн тэнцэл 289.7 сая ам.долларын ашигтай гарсан байна.
Эдгээр эерэг өөрчлөлтийн нөлөөгөөр Монгол Улсын Гадаад валютын албан нөөц 2016 оны 11 дүгээр сард өмнөх сартай харьцуулахад 25.5 хувь нэмэгдэж, 1,303.9 сая ам.долларт хүрчээ. Монголбанк Гадаад валютын албан нөөцийг олон нийтэд 3 сарын хоцрогдолтой мэдээлдэг байсныг өөрчлөн, 2014 оны 7 дугаар сараас эхлэн 1 сарын хоцрогдолтой зарлаж байна гэж Монголбанкнаас мэдээллээ.