-Та Н.Энхбаяртай уулзав уу?
-Уулзаад гарч ирлээ. Тэр өөрийг нь баривчлах гэхдээ маш зэрлэгээр загнаж, хүн гэж тоохгүй байсан гэж хэлж байна. Төрийн тусгай хамгаалалтад байгаа, хамгаалалт нь буугаагүй байгаа хүнд ингэж зэрлэг хандсаныг маш их гайхаж байна. Тэгээд харанхуй шөнөөр. Бас галт зэвсэг хэрэглэснийг үнэхээр гайхлаа. Бүгдээрээ галт зэвсгээс айдаг болчихсон, өмнөх хэргийн гашуун сургамж мартагдаагүй байхад галт зэвсэг хэрэглэж байгаа нь үнэхээр сонин юм. Э.Амарбат гэгч нөхөр галт зэвсэг хэрэглэж болно гэж хэлснийг туйлын их гайхаж байна.

-Түүнийг баривчлах гэж байгааг та юу гэж үзэж байгаа вэ?
-Долдугаар сарын 1-ний өдрийн үймээний үеэр улстөрийн намуудын дарга нар хуралдаж, асуудал ярьсан хурлын протоколыг өнөөдөр хэвлэлийнхэнд тараасантай нь энэ баривчилгаа давхцаж байгаа нь их хачин санагдаж байна. Хардлага, сэжиг төрүүлж байна. Би хувьдаа үүнийг хараад их эмзэглэлээ.

Түүнийг баривчлах гэж очсон хүмүүс нүүрээ хувцсаараа таглаад, ил гарахгүй байгааг зурагтаар харсан. Хэрвээ зөв, шударга юм хийж байгаа бол юунд тэгж ичээд байгаа юм бол. Энэ их сонин санагдсан.

-Та энд журмын нөхрийн хувьд ирсэн үү?
-Хүнд хүн чанар гэж байх ёстой. Тэр баривчилгаа хийх гэж байгаа гэх хүмүүс машиных нь цонх, толийг хагалж маш бүдүүлэг авирлаж байгааг хараад юу болж байна аа гэж гайхаад ирсэн. Ирээд юу болж байгааг мэдээд, ард түмэнд хэлье гэж бодсон.

-Одоо дотор ямар хүмүүс байна вэ. УИХ-ын гишүүд байна уу?
-Байна. Их аварга Д.Давгадорж, УИХ-ын гишүүн Ц.Шинэбаяр, Ч.Улаан, О.Чулуунбат гэсэн дөрвөн хүн байна. Ганц хоёр гишүүн утсаар ярьж байна лээ. Хөдөө, гадаанаас маш олон хүн залгаж, юу болоод байна аа гэж асууж байна.

-Баривчилгаа зогссон юм болов уу. Та энэ талаар мэдсэн үү?
-Авлигатай тэмцэх газрын Э.Амарбатын хэлж байгаагаар өнөөдөр баривчлах гэж байгаа юм шиг байсан.