АНУ-ын тусгай хүчнийхэн суман мөндөр дундуур гүйн Флорида мужийн Тампа хотын нэгэн дүүрэгт тусгай ажиллагаа явуулсан байна. Тэд байлдааны хаммер машин хөлөглөн гудамж талбайд цэргийн ажиллагаа явуулж, дайснуудаа устгаж байна. АНУ-ын агаарын хүчний онгоцууд болон Шенок нисдэг тэрэг агаараас дэмжсэн байна. Мөн нисдэг тэргүүд десант буулгасан байна. Гэхдээ энэ удаагийн тусгай ажиллагаа сургуулилт байжээ. Тусгай хүчнийхэн хэрхэн яаж сургуулилт хийдэг болон тусгай ажиллагааны үеэр тэд яаж үүрэг гүйцэтгэдгийг иргэдэд харуулж сурталчилсан нь энэ байв. Тусгай хүчнийхэн завь ашиглан жижиг тосгон руу дайралт хийж барьцааны хүмүүсийг сулласан байна. Олзны хүний дүрд Тампа хотын захирагч Боб Бакхорн тогложээ. Тэрээр тусгай хүчнийхэн хэрхэн яаж шуурхай ажиллаж, барьцаалагсдыг суллаж байгааг хараад бахархсанаа ярьсан байна. Тэнгисийн хүчний адмирал Уилям МакРэвений ярьснаар 90 гаруй орны зочид төлөөлөгчид, үзэгчид, аялагчид ирж үзүүлэх тоглолтыг үзэж сонирхсон байна. Мөн үзэгсчийн дунд жинхэнэ дайнд тэр тусмаа дэлхийн 2-р дайнд оролцож байсан ахмад дайчид хүртэл байсан байна. Ахмад дайчин Жон Камероны ярьснаар дэлхийн 2-р дайны үеийн зэвсэг техник, байлдах арга барил одоогийнхоос шал өөр байсан. Орчин үед зэвсэг техник түүнийгээ дагаад байдааны тактик хүртэл өөрчлөгджээ. АНУ-ын тусгай хүчний анги нэгтгэл дэлхийн 2-р дайны дараа байгуулагдсан бөгөөд үүнд Тусгай салаа, Арми, Тэнгисийн хүчин, Тэнгисийн явган цэрэг, Агаарын хүчин, Эргийн хамгаалалт, тагнуулын алба гээд олон хэсэг багтдаг байна.