Тэгш дөрвөн ой давхцаж, тэнгэрлэг сайхан наадсан наадмын өдрүүд өндөрлөж, намрын их ажлын өдрүүд эхэлж буй энэ үед TV ZONE сэтгүүлийн шинэхэн дугаар уншигч таны гар дээр очиж байна. Шинэ дугаарынхаа эхний хуудаснаа Монгол Улсын Ерөнхийлөгч Цахиагийн Элбэгдоржийн баяр наадмаар монголын ард түмэндээ хандан  мэндчилгээ дэвшүүлэх торгон агшныг, мэндчилгээ үгний хамт нийтэллээ.
Сэтгүүлийн амттай булангуудын эхлэл Шар хуудас энэ удаад олны танил эрхмүүдийн сонин хачныг дуулгаж байна. Үндэсний их баяр наадамдаа зориулж уран бүтээлчид олон сайхан бүтээлээр бэлэг барьсан. Наадмын өмнөхөн “мэндэлсэн” Монгол наадам хэмээх дууг дуучин BX, Нара нар хамтран бүтээжээ. Утга агуулгаасаа хальсан энэ уран бүтээлийг “монголоо алдсан юм” хэмээн хүлээн авах хүмүүс ч байна. Урлаг соёлынхон улс төр лүү шуугьж байгаа энэ үед харин дуучин Д.Болдын уул уурхайн салбарт эхүүлэх бизнес олны сонирхлыг татаж байна. Монгол Улсын Ерөнхийлөгч Н.Багабанди өөрийн үүсгэн бий болгосон “Чингис хаан”-ы одонгоор энгэрээ мялаалаа зэрэг сонирхолтой мэдээлэлтэй шар хуудсаа амтархан уншаарай. 
Тэгш дөрвөн ойгоороо дэнж хотойтол наадсан Монгол наадмын тухай TV ZONE сэтгүүлийн сэтгүүлчид өөр өөрийн өнцгөөр сонирхолтой мэдээлэл багцлан бэлтгэлээ. Наадмын өмнө тархсан адууны ханиад өвчнөөс сэргийлэх ажил болон унаач хүүхдийн даатгал, аюулгүй байдал, хамгаалах хувцас хэрэгсэл зэрэгт хэрхэн анхаарч ажилласан талаар Батлах хамгаалахын дэд сайд, Хурдан морины салбар хорооны дарга С.Баасанхүүгээс тодруулга авснаа Танилцах ярилцлага булангаараа уншигч танд хүргэж байна. 
Нийгэмд нэн түрүүнд тулгамдаад байгаа сэтгэл зовиноож, бухимдал төрүүлсэн асуудлыг хөнддөг манай сэтгүүлч нарын үгээрээ бас үзгээрээ илэрхийлдэг “Энэ сэдвээр...” буланд “Ар өврийн хаалга ба ажлын байр“ гарчиг дор хэдий мэргэжлийн дипломыг нь өвөрлөсөн ч ажлын байр хайж буй залуусын талаарх хөндүүр асуудлыг хөндөн бичлээ. Сэтгүүлч Х.Наранчимэгтэй энэ асуудлын гарцыг хайгаарай.

Уншигч тантай хамгийн ойр ажилладаг “Надад нэг асуулт байна” булан уншигч та бүхний илгээсэн ээлжит асуултад хариуллаа. Ажилтан, ажил олгогч гэж чухам хэн бэ? гэсэн асуултанд хуулийн зөвлөх хариулж байна.
“Зөвлөгөө” булангаас даралт ихсэх өвчтэй хүмүүст зориулсан зөвлөгөө, Спорт булангаас сагсан бөмбөгийн хорхойтнууд шинэ сонирхолтой мэдээлэл, Тайлагдаагүй нууцын тайлал, танин мэдэхүйн сонирхолтой мэдээллүүд болон бяцхан уншигч нартаа зориулсан үлгэр, буддаг зургууд, сонжоонд дуртай сонжоочдын зугаа, сканворд, судоку, шидэт зураг гээд “Зав гарлаа” булан иж бүрнээрээ таныг хүлээж байна.
      Долоо хоног тутмын сэтгүүлийн чухал мэдээллүүдээс гадна Монголын бүхий л телевизүүдийн хөтөлбөрүүд мэдээж бэлтгэгдлээ. Мөн Оросын хамгийн сонирхолтой сувгууд ч бидэнд хөтөлбөрөө ирүүллээ.

      TV ZONE сэтгүүлээ гэр бүлийнхээ гишүүн болгосон уншигч танд баярлалаа