Улаанбаатар хотод бүтээн байгуулалтын ажил өрнөж барилгын зураг төслийн болон угсралтын байгууллагуудын үйл ажиллагаа өргөжин тэлж байгаатай уялдан та бидний хариуцлага улам нэмэгдэж байна. Барилгын хөрөнгө оруулагч, захиалагч, зөвлөх үйлчилгээ үзүүлэгч болон гүйцэтгэгч компаниуд, тэдгээрийн эзэд Хот байгуулалтын тухай, Барилгын тухай хууль тогтоомжийг үл тоомсорлох, тэдгээрийн заалт, барилгын норм дүрмийг зөрчих, бусад зүй бус үйлдэл гаргасаар байгаа тул Нийслэлийн Иргэдийн Төлөөлөгчдийн хурал, Нийслэлийн Засаг даргын Тамгын газраас тодорхой ажлыг үе шаттай зохион байгуулж байна. Нийслэлийн Барилга, хот байгуулалт, төлөвлөлтийн газар нь иргэн, аж ахуйн нэгж, байгууллагад төрийн үйлчилгээг ил тод, шуурхай хүргэх тал дээр анхаарч ажиллаж байна.
Энэ хүрээнд иргэн, аж ахуйн нэгж, байгууллагаас ирсэн барилга барих өргөдөл, хүсэлтийг судлан Улаанбаатар хотыгхөгжүүлэх ерөнхий төлөвлөгөө болон хэсэгчилсэн ерөнхий төлөвлөгөө, газар зохион байгуулалтын ерөнхий төлөвлөгөө, холбогдох норм дүрмийг үндэслэн боловсруулсан барилга, байгууламжийн техникийн зураг төсөл боловсруулах даалгаврыг Улаанбаатар хотын Ерөнхий архитектор баталгаажуулан өгнө. Зураг төслийн байгууллага нь уг даалгаврын дагуу техникийн зураг төслийг боловсруулах, зөвлөх үйлчилгээ үзүүлэх үүрэгтэй. Барилга, байгууламжийн техникийн зураг төсөл боловсруулах даалгаврын дагуу боловсруулаагүй техникийн зураг төслийг хүлээн авахгүй болохыг мэдэгдье.
Улаанбаатар хотын Ерөнхий архитектор бөгөөд Нийслэлийн Барилга, хот байгуулалт, төлөвлөлтийн газрын дарга Н.Нацагдорж
АНХААРУУЛГА: УИХ-ын 2024 оны ээлжит сонгуулийн хуулийн холбогдох заалтын хүрээнд тус сайтын сэтгэгдэл хэсгийг түр хугацаанд хаасан болно.
