Сүүлийн жилүүдэд дэлхий дээр газар хөдлөлийн идэвхжил нэмэгдсэн  талаар Монголын Барилгын инженерүүдийн Холбооны ерөнхийлөгч Э.Ганзориг салбарын сайддаа мэдээлэл өгөв.  Манай улс  ч  бас эх газрын газар хөдлөлийн бүс нутагт хамаардаг тул газар хөдлөлийн аюул гамшгаас урьдчилан сэргийлж байх шаардлагатай.  Хот төлөвлөлт, барилгажилтыг хийхдээ барилгын чанарын бат бөхийг үнэлж тогтоох шаардлага ялангуяа сүүлийн үед үгүйлэгдэж буйг онцоллоо. 

Орон сууцыг хорооллоор барьж байсан өмнөх нийгмийн үед Улаанбаатар 7, Дархан 7, Эрдэнэтийн барилгыг 8 баллын газар хөдлөлтөнд тэсвэртэй байхаар барьж байсан. Харин сүүлийн жилүүдэд баригдаж байгаа барилгад газар хөдлөлийн эрсдэлийг үнэлж барьж байгаа нь цөөн.

Япон зэрэг газар хөдлөлт үргэлж мэдрэгдэж байдаг орнууд байгалийн энэ гамшигт үзэгдэлд цаг үргэлж бэлэн байдаг бол манайх тийм биш. Эх газрын газар хөдлөл цөөн дээр нь давтамжийн тоо бага учраас бид үл тоомсорлодог. Гэвч эх газрын газар нэг шилгээхээрээ хор хохирол ихээхэн дагуулдаг тухай мэдээллээ.

Ялангуяа Улаанбаатарт хүн ам төвлөрч хотжилт шигүү болж байгаа энэ үед барилга байшингийн чанарт онцгой анхаарах ёстой гэж эрдэмтэд салбарын сайддаа хэлж байна. Ингэхийн тулд барилгын хууль тогтоомжид өөрчлөлт оруулж байна гэж Барилга, хот байгуулалтын сайд Ц.Баярсайхан хэлж байсан юм.

Юуны өмнө энэ салбарт мөрдөж буй тусгай зөвшөөрлийн тоог цөөлнө. Харин зураг төслийн байгууллагуудад тавигдах шаардлагыг өндөрсүүлнэ.  Улаанбаатарт шинээр баригдах хорооллыг сайн бодолцох ёстой.  Барилгын норм дүрмийг эргэж харна гэлээ.

Монголын Барилгын инженерүүдийн холбооныхон энэ үеэр төрийн бус байгууллагынхаа эрхлэн явуулж байгаа ажлын талаар мэдээлэл өгөхийн зэрэгцээ барилгын салбарт аль  улсын норм дүрмийг авч ашиглавал манай орны нөхцөлд тохирох талаар яриа өрнүүллээ.