Уулзалтын эхэнд УИХ-ын дарга  “Гүүгл” компанийн хайлтын системд ажилладаг н.Баттулгаас ирүүлсэн цахим захиаг уншиж танилцуусан. Тэрбээр УИХ-ын даргын санаачлагыг твиттер хуудаснаас уншиж дэмжиж байгаагаа илэрхийлээд “Google translate”-д монгол хэлээ оруулах ямар боломж, нөхцөл байгаа талаар мэдээлэл ирүүлсэн байна. Тухайлбал, “Гүүгл” дүрэмд суурилаагүй, их хэмжээний мэдээллийн сан шаарддаг гэдгийг захиандаа дурджээ.

        Монгол хэлээ “Google translate”-д оруулснаар англи, орос, япон зэрэг бусад орны хэлнээ бичигдсэн мэдээ, мэдээллийг монгол хэл рүүгээ онлайнаар хөрвүүлэн унших боломжтой болох юм. Гэхдээ хүссэн мэдээллээ дэлхийд түгээмэл хэрэглэгддэг хэлүүдээс төрөлх хэл рүүгээ хөрвүүлэн унших боломжийг бүрдүүлэхийн тулд юун түрүүнд асар олон үгсийн сан бүхий мэдээллийн сан шаардлагатай байгаа талаар мэргэжилтнүүд ярьж байна. Тиймээс богино хугацаанд дээрх санаачлагыг хэрэгжүүлье гэвэл Bolor-toli.com-ыг эх болгож ашиглах, News.mn сайтын мэдээллүүдийг орчуулах зэрэг эхний алхмуудыг хийж болох талаар ярилцлаа.  Уулзалтын эцэст Мэдээллийн технологи, шуудан, харилцаа холбооны газрын дарга Т.Жадамбаа УИХ-ын даргын санаачлагыг хариуцан ирэх долоо хоногт мэргэжилтнүүдийн дунд дахин уулзалт зохион байгуулах, улмаар  ажлын хэсэг гаргаж ажиллахаар боллоо гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.