Монголын Арванбайт Боулингийн Холбооныээлжит тэмцээнүүд Үндэсний соёл амралтын хүрээлэнгийн боулинг төвд боллоо. Эхний тэмцээн зэрэггүй тоглогчдын хооронд зохиогдож, өмнөх оны 10-р сарын тэмцээнд үзүүрлэж байсан Г.Ууганболд 160,66 дундаж оноогоор анх удаагаа түрүүлж, энэ тэмцээнд 2 удаа аваргалсан Ж.Цэвэгмид удаалан, УАШТ-ий хос тоглолтын 4-р байрын шагналт Э.Молор гурвалжээ. Тэмцээнд Д.Сумьяа, С.Нарантөгөлдөр, Б.Болортайван, Лена, Б.Энхтуяа, С.Нарангарав нарыг сонирхогчид анх удаагаа оролцсон байна. Харин оны эхнээс зохиогдох болсон гурвалсан тоглолтын 2 дахь цуврал тэмцээнд спортын дэд мастер Г.Сундуйжав/Нью бэлэг/, 1-р зэрэгтэй тоглогч Б.Батхүү/Биг боулинг/, Г.Ууганболд нарын гурвал багаараа 165,33 дундаж оноо аван тэргүүлсэн бол 1-р сарын тэмцээнд аман хүзүүдсэн багаараа зэрэгтэй тоглогчид болох Ц.Батжаргал, Б.Мөнхтулга/хоёул Страйкес/, Д.Болордэлгэр/Паркийн боулинг/ нар амжилтаа бататгав. Гуравт дэд мастер Ш.Баатар/Нью бэлэг/, 1-р зэрэгтэй тоглогч Ж.Содномдорж/Страйкес/, Ж.Цэвэгмиднарын гурвал 3-р байрт шалгарчээ. Мөн энэ өдөр болсон тамирчдын ур чадварын “Strike’s shot” тэмцээний 10 дах цувралд 2-р зэрэгтэй тоглогч Г.Алтангэрэл/Мобиком/ анх удаагаа манлайлж, 1-р зэрэгтэй тоглогч Ц.Батжаргал дэд байрт орон, Н.Тамир, Э.Молор нар шөвгөрлөө. Энэ өдрийн оргил тэмцээн болох “А” зэрэглэлийн ПРО-МАСТЕРС тэмцээний 3 дахь цувралд дэд мастер Г.Сундуйжав 181,50 дундаж оноогоор итгэл төгс түрүүлж,шилжин явах цомын эзэн болсон бол 2 дахь цуврал тэмцээний ялагч дэд мастер Ш.Баатар 175,17 оноогоор удаалан, 2-р зэрэгтэй тоглогч Н.Тамир 170,83 дунджаар эхний гуравт багтсан байна. Дараагийн тэмцээн 3-р сарын 3-ны ням гаригийн 12:00 цагаас болох бөгөөд гурвалсан тоглолтын болон зэрэггүй тоглогчдын тэмцээнүүд холимог төрлөөр зохиогдоно. Харин “Strike’s shot” тэмцээнд өмнөх 10 цуврал тэмцээнд нийлбэр дүнгээр эхний 32-т шалгарсан тоглогчид оролцоно. Дээрхи тэмцээнүүдэд эрэгтэйчүүд 150, эмэгтэчүүд 140 дундаж оноо авбал сарын сүүлээр зохиогдох “А” зэрэглэлийн “ХОЛБООНЫ ЦОМ-2013” тэмцээнд оролцох эрхээ авнагэж Монголын Арванбайт Боулингийн Холбооноос мэдээллээ.
