Барилга, хот байгуулалтын сайдын зөвлөлийн хуралдаанаар Алтанбулаг-Улаанбаатар-Замын-Үүд чиглэлд  хурдны зам барих төслийн танилцуулгыг сонслоо.

Үндэсний томоохон компаниуд хамтран оролцох бүтээн байгуулалтын том энэ төслийг Чингислэнд деволопмент групп гүйцэтгэхээр шалгарсан юм байна.  Өмнөх засгийн газрын үед тендер зарлагдаж гүйцэтгэгчийг сонгожээ.

Чингислэнд деволопмент группт  Магнай трейд, Жаст, Насны зам, Монинжбар, Цаст Импекс гэх зэрэг 10 гаруй компани багтаж байна. Олон улсын түншлэлээр хэрэгжих төсөлд Итали, АНУ-ын нэр хүндтэй хөрөнгө оруулалтын зөвлөх  компаниуд оролцох юм байна.

Алтанбулаг-Улаанбаатар-Замын-Үүд чиглэлийн хурдны зам 1000 км урттай байна.  Төслийн бүтээн байгуулалтын ажлыг 2013 оны 5 дугаар сарын 1 нээс эхлүүлж 2015 оны 10 сард дуусгах төлөвлөгөө боловсруулжээ. 2,5 жилд багтаан дуусгахын тулд замын ажлыг нэгэн зэрэг эхлүүлнэ гэнэ. 

Энэ ажил концессын гэрээгээр хийгдэх бөгөөд 2015 оноос 2040 он хүртэл гүйцэтгэгч групп эзэмшинэ. Харин 2040 оноос улсын мэдэлд хүлээлгэн  өгөх юм байна.  Төслийн нийт өртөг  3,5 тэрбум ам доллар буюу 1 км автозамыг 3,5 сая ам доллараар барих аж. Хөрөнгө оруулалтын 70 хувийг олон улсын санхүүгийн зах зээлээс босгож, харин 30 хувийг өөрийн хөрөнгө оруулалтаар шийднэ.

Хурдны замыг евро стандартаар барих буюу олон улсын стандартын зам байна гэлээ.  Энэ зам олон улсын транзит тээвэр Ази Европыг холбосон гол маршрут байх болно гэж Чингислэнд деволопмент группын ерөнхийлөгч С. Отгонбаатар хэлэв.

Энэ оны байдлаар хоёр хөршийн хооронд 80 тэрбум ам долларын ачаа эргэлт хийгдэж байна.  Үүний 10 хувь нь хуурай, 90 хувь нь усан замын тээвэр. Энэ тоо 5 жилийн дараа 200 тэрбум  ам доллар болж өснө. Энэ том зах зээлийг холбож өгөхөд Алтанбулаг-Улаанбаатар-Замын-Үүд чиглэлийн хурдны зам хэрэгтэй байгаа гэж төслийнхөн онцоллоо.

Түүнчлэн транзит тээврээс гадна манай улсын нийгэм эдийн засагт чухал ач холбогдолтой гэж танилцууллаа.  Хурдны зам дагуу дагуул хотууд хөгжих, хот суурин газар бий болох, ложистикийн төв нээх, үйлчилгээний газрууд нээгдэх гэх мэт.

Хурдны зам барихад 1 сая тонн цемент шаардлагатай.  Евро стандартын өндөр чанартай цементийн үйлдвэр байгуулагдана. 2 урсгалтай, 2 эгнээ асфальт бетон хучилттай замын зузаан 70 см, олон улсын С1 зэрэглэлийн зам байна гэсэн танилцуулгыг сайдын зөвлөлийн гишүүд сонслоо.

Бүтээн байгуулалтын энэхүү том ажилд яамдуудаас санал авч байгаа юм байна.

Барилга, хот байгуулалтын сайд Ц.Баярсайхан “ Монгол Улсад концессоор хийгдэх бүтээн байгуулалтын том ажил.  Олон улсын хэмжээний энэ том төсөлд барилгын материалын үйлдвэрлэлийг яаж хангах вэ, дайран өнгөрч буй суурин газарт хот төлөвлөлт, тээвэр ложистикийг хэрхэн хийх вэ, мөн хурдны зам дагуу монгол улсын иргэдэд газар өмчлүүлэх гэсэн өргөн хүрээтэй асуудал гарч ирнэ “ гэлээ.

Алтанбулаг-Улаанбаатар-Замын-Үүд чиглэлийн хурдны зам төслийг ойрын үед Засгийн газрын хуралдаанаар хэлэлцэх юм байна.