Улаанбаатар хотын тулгамдсан асуудлын нэг болсон агаарын бохирдлыг бууруулах чиглэлээр  Монгол Улсын Засгийн Газраас болон нийслэлээс хэд хэдэн  томоохон төсөл хөтөлбөрийг хийж хэрэгжүүлээд байгаа юм. Тухайлбал  гэр хорооллын агаарын чанарыг сайжруулах хязгааралтын бүсийг гэр хорооллын гурван хэсэгт тогтоож, хязгаарлалтын бүсэд багтах айл  өрхөд боловсруулсан түлш хэрэглэх, утаагүй зуухыг хөнгөлөлттэй үнээр хангах  зэрэг ажлыг шат дараатайгаар хэрэгжүүлээд байгаа билээ.  Харин энэ жилийн хувьд хязгаарлалтын бүсэд байгаа айл өрхүүдэд хөнгөлөлттэй үнээр усан халаалттай зуух нийлүүлж эхлээд байгаа бөгөөд энэ ажлыг  нийслэлийн Агаарын чанарын алба, Цэвэр агаар сантай хамтран хэрэгжүүлэхээр  боллоо. Монгол улсын Засгийн газрын тусгай сан ”Цэвэр агаар сан”-гийн гүйцэтгэх захирал Н.Хүрэлсүх, Нийслэлийн Засаг даргын Экологи, ногоон хөгжлийн асуудал эрхэлсэн орлогч Т.Бат-Эрдэнэ нар өнөөдөр харилцан ойлголцлын санамж бичигт гарын үсэг зурлаа.  Энэхүү хамтын ажиллагааны хүрээнд талууд утаа бага ялгаруулдаг зуухны зах зээлийг тогтвортой байдлаар хөгжүүлэхээс гадна харилцан мэдээ мэдээлэл, туршлага сургамжаа солилцож байхаар боллоо гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.