Монгол, Куба Улсуудын уламжлалт найрсаг харилцааг харгалзан, талуудын хамтын ажиллагааг өргөжүүлэн хөгжүүлэх, хуучин тогтолцооноос өвлөгдөн ирсэн авлагын асуудлыг нэг мөр зохицуулах үүднээс Засгийн газрын хуралдаанаар хэлэлцүүлэн шилжих рублиэр илэрхийлэгдсэн клирингийн дансны өр авлагыг хүчингүй болгох буюу Бүгд Найрамдах Куба Улсын Засгийн газрыг өр эргэн төлөх үүргээс чөлөөлөх шийдвэр гаргасан.
Засгийн газрын уг шийдвэрийн дагуу 2013 оны 3 дугаар сарын 22-ны өдөр БНКУ-ын нийслэл Гавана хотноо “Өр хүчингүй болгох тухай Монгол Улсын Засгийн газар, Бүгд Найрамдах Куба Улсын Засгийн газар хоорондын хэлэлцээр” байгуулагдлаа.
Хэлэлцээрт Монгол Улсын Засгийн газрыг төлөөлж Монгол Улсаас БНКУ-д суугаа Онц бөгөөд Бүрэн Эрхт Элчин сайд О.Даваасамбуу, Бүгд Найрамдах Куба Улсын Засгийн газрыг төлөөлж Кубын Үндэсний банкны Ерөнхийлөгч Рене Лазо Фернандез нар гарын үсэг зурлаа.
Кубын тал сүүлийн жилүүдэд жилд 2-3 монгол оюутанг өөрийн зардлаар сургаж байгаагаас гадна хөдөө аж ахуйн салбарт хамтран ажиллах үүднээс сүүний үүлдрийн ямааны гүн хөлдөөсөн 5000 тун үрийг хоёр удаа хандивласан. Мөн биеийн тамир, эрүүл мэндийг хөгжүүлэх ажлын хүрээнд монголын боксын тамирчдыг сургах, дасгалжуулах зорилгоор мэргэжлийн дасгалжуулагч нар илгээж байсан болно.
