Поп дива МУГЖ Ж.Алтанцэцэг эх үрсийн баяраар “Соёлын төв өргөө”-нд “Алтанцэцэг” хэмээх өөрийн бие даасан 3D тоглолтоо үзэгч сонсогчиддоо өргөн барихаар зэхэж байгаа сурагтай. Түүний хувьд өнгөрсөн хоёр жил дараалан 6 сарын 1-нд хүүхэд багачууддаа тоглолтуудаа хүргэж байсан бөгөөд 2011 онд “Хүүхэд насны дурсамж ”, 2012 онд “Ногоон орчин бидний ирээдүй” зэрэг тоглолтуудаа толилуулаж байсан бол энэ удаагийн тоглолтоо илүү өргөн цар хүрээтэй хийхээр бэлтгэл ажилдаа явж байгаа гэнэТоглолтыг чадварлаг баг, хамт олон зохион байгуулж байгаа бөгөөд тоглолтонд дуучны маань олон сайхан хит дуунууд эгшиглэхийн зэрэгцээ шинэ уран бүтээлүүд нь үзэгч сонсогчиддоо анх удаа хүрэх аж. Энэ тоглолтын онцлог нь хагас жилийн хугацаанд бэлтгэгдэж буй маш өндөр хэмжээний бэлтгэлтэй, хөрөнгө хөдөлмөр зарцуулж орчин үеийн техник технологийн дэвшлийг ашигласан “3D” гэрэл болон хлограммыг ашиглаж орчин үеийн тоглолтын хэв маягийг эвдэхээр эрс шийдсэн гэнэ. Тоглолтын ерөнхий найруулагчаар Монгол Улсын төрийн шагналт, МУГЖ Д.Сосорбарам ажиллах бөгөөд урилгаар МУГЖ Б.Дашдондог,  Поп дива С.Наран, МУСТА Ө.Уянг, Ц.Хулан, Б.Маралжингоо, А.Түмэн-Өлзий, Ж.Чингис, Хүүхдийн ордны найрал дуучид оролцох юм байна.  Түүнчлэн МУГЖ Ж.Алтанцэцэгийн бяцхан охин ээжтэйгээ хамтран дуулах гэнэ.