Худалдан авах ажиллагааны газраас цахим худалдан авалтын системийг нэвтрүүлж, өнөөдрийн байдлаар 15 тендерийг  цахим хэлбэрээр зарлаад байна. Цахим системийг нэвтрүүлснээр нээлттэй, үр ашигтай, шудрага, ил тод байдал нэмэгдэх, тендер зохион байгуулах зардал багасах, төсвийн үргүй зардлыг хэмнэх, худалдан авах ажиллагааны хяналтыг дээшлүүлэх зэрэг олон давуу талыг бий болгож байна.

 Уламжлалт худалдан авах ажиллагааны үед Худалдан авах ажиллагааны газар 1 тендерийн зардалд 218,750 төгрөг, 100 тендерт 21,075,000 төгрөгийн зардал гаргадаг байсан бол цахим системийг нэвтрүүлснээр 92,57 хувийн хэмнэлт гарж 1 тендерт 16,250 төгрөг, 100 тендерт 1,625,000 төгрөгийн зардал гаргаж 20,250,000 төгрөгийн  хэмнэлт хийх боломжтой.

Харин тендер шалгаруулалтын явцад 1 оролцогчоос 1 тендерт 226,050 төгрөг, 100 тендерт оролцоход 113,025,000 төгрийн зардал гаргадаг байсан бол 61,07 хувиар багасч 44,000,000 төгрөг болж 69,025,000 төгрөгийн зардал хэмнэхээр байна.

Мөн тендерийн баримт бичиг худалдаж авахад 100,000 төгрөг зарцуулдаг байсан бол цахим системийг хэрэглэснээр 20,000 төгрөг буюу 80 хувийн хэмнэлтийг тендерт оролцогчдод үзүүлж байна.

 Судалгаанаас харахад эдгээр бүх тендерийн материалыг худалдаж авах, тендерийн бичиг хүргүүлэх, санхүүгийн тайлан хэвлэх зэрэг ажилд жилд дундажаар 193 тонн цаас хүргүүлдэг ба эдгээр бүх ажиллагааны нийт өртөг хоёр тэрбум төгрөгтэй тэнцдэг байсан.

Цахим систем бүрэн нэвтэрснээр Монгол банк, Үндэсний Татварын Ерөнхий газар, Улсын бүртгэлийн ерөнхий газар болон арилжааны банкны системтэй холбогдож тендерт оролцогчид бичиг баримт хэвлэх, шүүх, цагдаа, нотариат,  татвар, банкны тодорхойлолт авахаар явах шаардлагагүй болох юмаа.

Мөн Худалдан авах ажиллагааны газрын 1 давхарт Нэг цэгийн үйлчилгээний танхимд нотариат, банк болон хууль, инженерийн холбогдох мэргэжилтэнүүд  зөвөлгөө үйлчилгээ үзүүлж, цахим системд үнэ төлбөргүй бүртгэж байна.