Улсын Их Хурлын Төрийн байгуулалтын байнгын хорооны 2013 оны 04 дүгээр сарын 24-ны өдрийн 03 дугаар тогтоолын дагуу  өнөөдөр Улсын Бүртгэлийн Ерөнхий газарт сонгогчийн нэрийн жагсаалт, бүртгэлийн хяналтын дэд хорооны дарга, УИХ-ын гишүүн Ж.Батзандан, тус хорооны ажлын албаны референт Б.Хатантуул, УИХ-ын ажлын албаны Ж.Цогтсайхан нар ажиллалаа.
Тэд Монгол Улсын Ерөнхийлөгчийн сонгуулийн тухай хуульд заасан сонгуулийн бэлтгэл ажил болон сонгогчдын нэрийн жагсаалт үйлдэх явц, түүнд тавьж буй хяналт болон сонгуулийн ажлыг хэрхэн хангаж ажиллаж байгаа болон гадаадад ажиллаж амьдарч байгаа иргэдийн сонгуульд орох бүртгэлийн байдал, сонгуулийн хууль тогтоомжийг иргэдэд танилцуулах, сурталчлах ажлын зохион байгуулалт ямар байгаатай танилцсан юм. Улсын бүртгэлийн ерөнхий газрын Ц.Пүрэвдорж энэ үеэр Монгол Улсын Ерөнхийлөгчийн сонгуулийн тухай хуулийг хэрэгжүүлэх ажлыг  төлөвлөгөөний дагуу цаг хугацаанд нь хийж  байгааг онцлоод гадаадад ажиллаж амьдарч байгаа иргэдийг иргэний шинэчилсэн бүртгэлд хамруулах,  иргэний бүртгэлийн зөрчилтэй байгаа асуудлыг шуурхай шийдвэрлэх, сонгогчдыг санал өгөх боломжоор хангаж,  иргэний үнэмлэхийн тараалтыг эрчимжүүлэх зэрэг ажлыг хийж  байна. Түүнчлэн сонгогчдын нэрийн жагсаалттай холбоотой техник технологи, програм хангамжийн ажлыг хийж гүйцэтгэлээ. Тухайлбал өнөөдрийн байдлаар давхардах боломжгүй програм хангамжийг бий болгон  иргэний бүртгэл мэдээллийн нэгдсэн санг ашиглан сонгогчдыг нэрийн жагсаалтыг үйлдэж аймаг, нийслэлийн сонгуулийн тойргийн хороонд хүргүүллээ. Үндсэндээ  сонгуулийн бэлтгэл ажил төлөвлөгөөний дагуу  хангагдаж байна  гэлээ.
Ийнхүү УИХ-ын гишүүн Ж.Батзандан сонгуулийн бэлтгэл ажлын явц, байдалтай танилцсаны дараа сонгуулийн хуулийн хэрэгжилтэд сайн зохион байгуулан ажиллаж байгааг дурьдаад сонгууль болоход сар хүрэхгүй хугацаа үлдэж байна. Тиймээс үлдсэн энэ хугацаанд энэ чиглэлээр хийсэн болон хийх гэж байгаа ажилдаа онцгой анхаарч хуулийн заалтыг нэг бүрчлэн биелүүлж ажиллахыг үүрэг болгов.