“Татар” хамтлагийнхан өнгөрсөн амралтын өдөр шинэ цомог, шинэ аян, шинэ уран бүтээлээрээ шинэ түүхээ эхлүүлж буйгаа албан ёсоор зарлан Үндэсний соёл амралтын хүрээлэнд “Нөлөөллөөс дээгүүрт” аяны нээлтээ хийсэн билээ. Тэд амласан ёсоор өөрсдийн тоглолтоо үнэ төлбөргүй хүргэх “Аялан тоглолт”-оо Сонгинохайрхан дүүргийн Баянхошууны Хөтөл дээр өнөөдөр 19.00 цагт эхлүүлэхээр болжээ. Энэ жил 10 настайгаа золгож  буй “Татар”-ынхан эрийн цээнд хүрч, уран бүтээлээрээ дамжуулан нийгмийн сайн сайхны төлөө дуу хоолойгоо өргөхөөр эргэн нэгдсэн юм. Тэд ойн баяртаа зориулж, “Нөлөөллөөс дээгүүрт” цомог гаргасан бөгөөд цомгийн баяраа хийж, фенүүдтэйгээ уулзахаас гадна нийгэмд чиглэсэн олон ажил хийхээр төлөвлөсөний нэгээхэн хэсэг нь уг аян аж. Түүгээр ч барахгүй цомгийнхоо нэрээр нэрлэсэн аянаа "Архины эсрэг" уриан дор бүтэн жилийн хугацаанд хэрэгжүүлэхээр төлөвлөжээ. Нийслэлд хийх аялан тоглолтдоо “Татар”-чууд “Бороо”, “Чинийх”, “Бусдын хайрыг хүндэл”, “Эсрэг өдөр” гээд хит дуунуудаараа залуусыг доргиохоос гадна шинэ цомгийн уран бүтээлээ ч хүргэхээ амлаад байгаа шүү. Тоглолтын үеэр нийгэмд зөв хэвшил, хэрэглээ бий болгох зорилго өвөртөлсөн залуус “Нөлөөллөөс дээгүүрт” шинэ цомгоо 1000 төгрөгөөр борлуулж, орлогоо бүгдийг нь архины эсрэг үйл ажиллагаа явуулдаг байгууллагуудад хандивлана гэдгээ аль хэдийнээ дуулгаад амжсан.  Аяны хүрээнд тэд “Нөлөөллөөс дээгүүрт” цомгийн баяраа нийслэл хотоо тойрон 60 удаагийн тоглолт хийхээр төлөвлөсөн байна. Тэдний нийслэл дэх "Аялан тоглолт" дүүргүүдийн задгай талбайд үнэ төлбөргүй болохыг сануулъя. Тоглолтын үеэр мөн хандивын данс аялуулж, цугласан мөнгийг архидалтын эсрэг үйл ажиллагаанд зарцуулах юм байна. “Татар” хамтлагийн 10 жилийн ойдоо барьж буй бэлэг болох уг аян зөвхөн нийслэл хотод өрнөөд зогсохгүй ирэх намраас хөдөө орон нутагт үргэлжилнэ.