Байгаль орчин, ногоон хөгжлийн яам, Хил хамгаалах ерөнхий газартай 2013-2016 онд хамтран ажиллах тухай Санамж бичиг байгуулсан билээ. Гэрээнд тусгагдсан ажлууд амжилттай хэрэгжиж байна. Хамтын ажиллагааны хүрээнд 2013 онд Сэлэнгэ, Хэнтий аймгийн түймрийн эрсдэл ихтэй улсын хилийн дагуу 10 метр өргөн, 150 км урт түймрээс хамгаалах зурвас байгуулах гэрээг сая байгуулсан. Харин өнөөдөр гал түймрийн эрсдэлтэй газар нутагт байрладаг хилийн застав, салбар нэгжүүдийн галын аюулаас урьдчилан сэргийлэх ажилд дэмжлэг үзүүлэх зорилгоор БОНХЯ-наас түймрийн тархалтыг хориглох, унтраах зориулалттай 5 нэр төрлийн 75 ширхэг, нийт 30 гаруй сая төгрөгийн өртөг бүхий  багаж хэрэгслийг  Хил хамгаалах ерөнхий газарт хүлээлгэн өгөв. Энэхүү үйл ажиллагааг нээж БОНХ-ийн Сайд С.Оюун хэлсэн үгэндээ “Бидний ажлыг дэмжиж, хамтран ажиллаж байгаад баяртай байна. Энэ хаврын гал түймрийн стастистик тоо урьдчилсан байдлаар гарсан. Хэдийгээр 120-иод түймэр гарч, тэдгээрт  2.2 сая га газар, 4.5 мянган га ой, 2.1 сая га бэлчээр нутаг өртсөн ч өнгөрсөн оны мөн үеийн түймрийн статистик үзүүлэлттэй харьцуулахад  нааштай мэдээ гарлаа. Өнгөрсөн оны мөн үеийнхтэй харьцуулахад нийт түймрийн тоо 13.7%, ойн түймэрт шатсан талбай 98.5%, хээрийн түймэрт шатсан талбай 52.6 % -иар тус тус буурчээ. Түймрээс урьдчилан сэргийлэхэд зөвхөн байгаль орчин, онцгой байдал эрхэлсэн байгууллагуудын асуудал биш, орон нутаг болоод байгаль орчинтой харьцаж үйл ажиллагаа явуулж буй байгууллага, хүн бүрийн оролцоо  чухал. Байгалиа хамгаалах, гал түймрээс урьдчилан сэргийлэх, иргэдээ соён гэгээрүүлэхэд салбарын яамнаас анхаарч байна” гэдгийг онцлов. С.Оюун сайд цааш нь түймрээс урьдчилан сэргийлэх Засгийн газрын 106-р тогтоол, БОНХ-ийн Сайдын 2013 оны 01 тоот албан даалгавар  хэрэгжиж, яамны дэргэд түймрээс урьдчилан сэргийлэх шуурхай зохицуулалтын алба, орон нутагт түймрээс урьдчилан сэргийлэх, хамгаалах зөвлөл байгуулж,   түймрийн аюулын зэрэгтэй уялдуулан эргүүл, харуулыг тогтмол ажиллуулж, сургалт хийх, зурвас гаргах зэрэг оновчтой ажлуудыг ч зохион байгуулж байгаа хилчдэд дуулган “Эрхэм хилчид та бүхэнтэй хамтран 2016 он дуустал улсынхаа  торгон хилийн ихэнх хэсгийг  зурвасжуулан хил дамнасан түймрээс урьдчилан сэргийлэх болно гэдэгт итгэлтэй байна” гэв.