Монгол Улсаас Бүгд Найрамдах Чех Улсад суугаа Элчин сайд Д.Зүмбэрэллхам тусгай үүргийн Кбелы нисэх буудалд тус улсын Хөгжлийн хамтын ажиллагааны хүрээнд хэрэгжүүлж буй “Монголд Тахь эргэн нутагшуулах, хамгаалах” төслийн хүрээнд 4 тахийг үдэх ёслолын ажиллагаа, хэвлэлийн бага хуралд оролцлоо.
“Монголд Тахь эргэн нутагшуулах, хамгаалах” төсөл нь 2011 оноос хэрэгжиж байгаа бөгөөд энэ удаагийн гуравдугаар ээлжийн тахийг Говь-Алтай аймгийн говийн их дархан цаазат газар, Тахийн тал, Тахийн усанд нутагшуулах ажээ.
Эдгээр тахийг Чехийн цэргийн нисэх хүчний "CASA С-295М" онгоцоор Монгол руу тээвэрлэн хүргэх бөгөөд Засгийн газрын 2013 оны 6 дугаар сарын 26-ны өдрийн хуралдаанаар холбогдох зөвшөөрөл өгсний үндсэн дээр тахийг тээвэрлэсэн онгоц 20 гаруй цаг нисч Ховд аймгийн нисэх буудалд газардах юм.
