Дэлхийд нэр хүндтэй "J.D. Power and Associates" байгууллагаас 2 жил тутамд нэг удаа явуулдаг хэрэглэгчийн сэтгэл ханамжийн судалгаагаар Samsung –ийн таблет компьютер iPad –ийг анх удаа ардаа орхижээ. Гэхдээ зарим ажиглагчид энэ судалгааны дүн тийм ч бодитой бус гэж дүгнэж байна.

J.D. Power байгууллагаас гаргасан жагсаалтыг Samsung 835 оноогоор тэргүүлсэн бол Apple ялимгүй доогуур буюу 833 оноогоор удаалжээ. Эдгээрийн араас Amazon, Asus болон Acer брэндийн таблетууд бичигдсэн байна. Энэ жагсаалтыг гаргахдаа энэ оны 3-аас 8-р сарын хооронд таблет хэрэглэдэг 3375 хүнээс судалгаа авчээ. Өөрөөр хэлбэл өнгөрсөн долоо хоногт шинээр худалдаанд гарсан iPad Air, iPad Mini –ийн хэрэглэгчид судалгаанд хамрагдаагүй гэсэн үг юм.

Технологийн салбарын зарим мэргэжилтнүүд J.D. Power байгууллагын үнэлгээний системд эргэлзэж байгаагаа илэрхийлсэн байна. Учир нь судалгаанд оролцогчид хурд, загвар зэрэг 5 шалгуур үзүүлэлтийн 4 –т нь Apple –ийн iPad –ийг Samsung –ийн таблетуудаас өндрөөр үнэлжээ. Samsung –ийн таблетууд ганцхан шалгуур дээр өндөр оноо авсан байна.

Тэр нь үнэ.  Тухайлбал Samsung –ийн "Galaxy Tab 3" нь бараг 8 инч дэлгэцтэй, 16 гегабайтын багтаамжтай бөгөөд 299 ам.доллараар зарагддаг. Харин ойролцоо үзүүлэлттэй таблет болох "iPad Mini" 399 ам.долларын үнэтэй байна.

РАЛЬДИЙ.А /shuum.mn/