НҮБ-ын төрөлжсөн байгууллагууд болох Олон улсын иргэний нисэхийн байгууллага болон Тэнгисийн олон улсын байгууллага нь дэлхий нийтийг хамарсан эрэн хайх, авран туслах тогтолцоог бий болгох үүднээс энэ талын бодлогыг сүүлийн жилүүдэд идэвхтэй хэрэгжүүлж байгаа.

Ялангуяа олон улсын иргэний нисэхийн тухай конвенциудад энэ талын асуудлыг тодорхой тусгаж, хил залгаа орнуудыг эрэн хайх, авран туслах салбарт хамтран ажиллах хэлэлцээр байгуулж, эрхзүйн орчныг бүрдүүлэхийг уриалах болсон.

    Манай улсын хувьд энэхүү бодлогыг хэрэгжүүлэх үүднээс Монгол Улс, ОХУ-ын Засгийн газар хооронд нисэхийн эрэн хайх, авран туслах салбарт хамтран ажиллах хэлэлцээрүүдийг 2006, 2008 онуудад байгуулсан. Харин өнгөрсөн сард Монгол Улсын Ерөнхий сайдын БНХАУ-д хийсэн албан ёсны айлчлалын үеэр “Иргэний агаарын хөлгийг эрэн хайх, авран туслах ажиллагааг зохицуулах тухай Монгол Улсын Засгийн газар болон Бүгд Найрамдах Хятад Ард Улсын Засгийн газар хоорондын хэлэлцээр”-т талууд гарын үсэг зурж баталгаажуулсан юм.

    Өмнөд хөрштэй энэхүү хэлэлцээрийг байгуулсан нь хоёр улсын хооронд агаарын харилцаа улам өргөжиж, нислэгийн тоо нэмэгдэх төлөвтэй байгаа, мөн улсын хилийн нийт уртын 57 хувиар холбогддог, нийт зургаан агаарын хаалгатай манай орны хувьд Олон улсын иргэний нисэхийн байгууллагын бодлогыг бодитоор хэрэгжүүлэн олон улсын өмнө хүлээсэн үүргээ зохих түвшинд биелүүлж байгаагийн тод илрэл болохын сацуу бусад оронд үлгэрлэсэн чухал ач холбогдолтой эрх зүйн баримт бичиг болсон. Мөн Монгол Улсын агаарын зайг ашиглан нислэг үйлддэг агаарын тээвэрлэгчдийн зүгээс ч манай орны иргэний нисэхийн салбарт үзүүлэх итгэл нэмэгдэн, нислэгийн тоогоо олшруулах боломжтой болж байгаагаараа онцлог үйл явдал боллоо гэж албаныхан үзэж байгаа юм.

Хэлэлцээр байгуулснаар хоёр тал хилийн залгаа нутаг дэвсгэр, агаарын зайд аюулд нэрвэгдсэн, аюул тулгарсан агаарын хөлөгт үндэсний харьяалал, нийгмийн байдал, илрүүлсэн нөхцөл байдлыг үл харгалзан богино хугацаанд тусламж үзүүлэх эрх зүйн зохицуулалттай болж, Олон улсын иргэний нисэхийн байгууллагын стандарт, зөвлөмжийг  нэгдсэн зохицуулалттай хэрэгжүүлнэ.