Өлсгөлөн Тоглоом киноны шинэ анги болох "Catching Fire" АНУ-ын хамгийн өндөр орлоготой шинэ киноны жагсаалтыг хоёр долоо хоног дараалан тэргүүллээ. Харин аман хүзүүнд Диснейн "Frozen" хүүхэлдэйн кино явж байна. Урьдчилсан тооцоогоор Өлсгөлөн Тоглоом 110.2 сая ам.доллар, Frozen 93 сая ам.долларын орлого олжээ. Өөрөөр хэлбэл Талархлын баярын үеэр нээлтээ хийж, хамгийн өндөр орлого олсон киногоор Frozen тодров. Энэ хүүхэлдэйн кинонд хатан хаан эгч нь ид шидийн хүчээрээ улс орноо хөлдөөсний дараа вант улсаа аврахаар хичээж байгаа Скандинавын гүнжийн тухай гардаг ажээ.
Жагсаалтыг тэргүүлж байсан "Thor" кино 15.5 сая ам.долларын орлогоор 3-р байр луу ухарсан байна. Харин 4-рт 11.1 сая ам.долларын орлогоор "The Best Man Holiday" кино орсон бол үүний араас Силвестер Сталлоне зохиолыг нь бичиж, Жэсон Стэтхэмийн гол дүрд нь тоглосон "Homefront" кино бичигджээ. Энэ кино 9.8 сая ам.долларын орлого олсон байна.
Хойд Америкийн театруудад шинээр нээлтээ хийсэн кинонууд энэ жилийн Талархлын баярын үеэр нийтдээ 294 сая ам.долларын орлого олжээ. Харин өнгөрсөн онд орлогын хэмжээ 290 саяд хүрч байсан байна.

РАЛЬДИЙ.А /shuum.mn/