АН-ын Ерөнхий нарийн бичгийн дарга Ц.Оюундарь, “АН энэ оныг дотоод сургалтын жил болгон зарласан. Энэ ажлын хүрээнд 21 аймаг, 330 суманд сургалт зохион байгуулж, сургагч багш бэлтгэнэ. Мөн сум бүрээс хоёр хүнийг Удирдлагын академид сургаж байна. Говь-Алтай аймгийн ИТХ анхдугаар чуулганаа өчигдөр хийж ИТХ-ын даргаар А.Дэлгэржаргал сонгогдсон бол Засаг даргаар О.Амгаланбаатарыг томилуулахаар санал нэгдсэн байна” гэсэн юм.

 

Монгол Улсын сайд, ЗГХЭГ-ын дарга Ч.Сайханбилэг энэ онд хийх бүтээн байгуулалтын талаар мэдээлэл өглөө. Түүний хэлснээр энэ онд бүтээн байгуулалтын ажлууд эрчимтэй өрнөнө гэдгийг хэлсэн. Шинэчлэлийн Засгийн газрын 2014 оны бүтээн байгуулалтын гол стратеги нь импортыг орлох экспортыг дэмжих замаар эдийн засгийн зөв бүтцийг буй болгох гэж томъёолжээ. Ингэснээр эдийн засгийн хүндрэл, долларын ханшийн өсөлтийн эсрэг нийгмийн хавтгайруулсан халамжаасаа илүүтэй үндэсний үйлдвэрлэлийг дэмжиж ажлын байрыг хадгалах, улмаар нэмэх, иргэдийг ажилтай тогтмол орлоготой байлгаж, чинээлэг дундаж давхаргыг бий болгох нь чухал гэж үзэж байгаа гэнэ.

 

Бүтээн байгуулалтын ажлын нэн түрүүнд төмөр замын царигийн асуудлыг Засгийн газрын хуралдаанаар хэлэлцэж, УИХ-ын хаврын чуулганаар эцэслэн шийдвэрлэх бол энэ жил эхний ээлжинд 267 км төмөр зам барих юм байна. Түүнчлэн 21 аймгийн Улаанбаатар хоттой хатуу хучилттай замаар холбох ажлын хүрээнд энэ онд зургаан аймгийг хатуу хучилттай замаар холбох юм байна. Үүнд, өнгөрсөн жилийн ажлаас үлдсэн Хөвсгөл, Дорнод аймгийг гүйцээх бол шинээр Сүхбаатар, Говь-Алтай, Завхан, Өмнөговь аймгийн Улаанбаатар хоттой хатуу хучилттай замаар холбох аж.

 

Мөн гудамж төслийн хүрээнд 33 уулзварыг шинэчилж засварлахаас өнгөрсөн онд 18 уулзварыг өргөтгөжээ. Харин энэ онд 15 уулзварыг шинэлчилнэ гэдгээ сайд Ч.Сайханбилэг онцолж байлаа. Энэ ажлуудыг хийх төсвийг дөрвөн эх үүсвэрээс бүрдүүлнэ. Тодруулбал, төсвийн хөрөнгө оруулалт, Чингис бонд, Самурай бонд болон дотоодын хөрөнгө оруулалтыг татах чиглэлээр төсөл хөтөлбөрүүдийг санхүүжүүлэхээр болсон гэдгийг хэлж байна.