Хүүхэд ахуйдаа Холливудын од болсон жүжигчин Ширли Темпл 85 насандаа таалал төгслөө. Тэрээр даваа гарагт Калифорнийн Вудсайд хот дахь гэртээ гэр бүлийнхнийхээ хажууд амьсгал хураасан гэж гэр бүлийнх нь мэдэгдэлд бичсэн байна. 1930-аад онд Bright Eyes, Stand Up and Cheer болон Curly Top зэрэг кинонуудад тоглож олонд танигдсан Ширли 1950 онд буюу 21 насандаа кино урлагийн тайзнаас буусныхаа дараа Бүгд Найрамдах Намаас Конгресст нэр дэвшсэний зэрэгцээ дипломатч болж дахин олны анхаарлын төвд орж байжээ.

1928 онд төрсөн Ширли Темпл хүүхэд ахуйдаа олонд танигдсан Холливудын түүхэн дэх хамгийн алдартай жүжигчдийн нэг бөгөөд хамгийн анх гурван настайдаа кинонд дүр бүтээж байсан аж. Түүний дуулж бүжиглэх, жүжиглэх хосгүй авьяас нь дэлхийн олон мянган үзэгчдийн хайрыг татсан юм. Ширли дөнгөж зургаан настай байхдаа буюу 1935 онд хүүхдэд олгодог Оскарын тусгай шагналыг хүртсэн нь үүнийг гэрчилнэ.

РАЛЬДИЙ.А /shuum.mn/