Ихэнх нийгмийн сүлжээ сайтууд хүмүүсийг холбож, танилын хүрээг тэлэх зорилготой байдаг бол үүний эсрэгээр хүмүүсээс хол байхад тань туслах нэгэн шинэ үйлчилгээ гарсан байна. Cloak нь Foursquare, Instagram зэрэг бусад нийгмийн сүлжээний байршлын талаарх мэдээллийг ашигладаг бөгөөд үүний тусламжтайгаар хэрэглэгч таньдаг хүмүүсийнхээ байршлыг тодорхойлж болдог аж. Мөн тодорхой зарим хүмүүс, магадгүй уулзахыг хүсээгүй хүн тань таны ойролцоо байвал сануулга, анхааруулга хүлээн авах тохиргоог ч сонгож болох юм байна.  'Нийгмийн эсрэг' мөн нууц хэмээх ангилалд багтаж буй аппликейшнүүдийн хамгийн сүүлийнх нь Cloak болж байгаа юм. Илгээгдсэн зураг бичлэгийг үзсэний дараа устгадаг гэдгээрээ онцлогтой Snapchat болон таны нэр усыг мэдэгдүүлэхгүйгээр мессеж илгээдэг Secret зэрэг аппликейшнүүдийг хэрэглэгчдийн тоо өсч байна. Харин Cloak –ийг ашиглах нь экс амраг, хамтран ажиллагсад, чалчаа залуу гээд харилцахыг хүсэхгүй байгаа хүмүүсээс хол байх арга гэдгийг тус аппликейшнийг бүтээгчид хэлж байна. Дашрамд дурдахад Cloak –ийг программист Брайн Мур болон Buzzfeed сайтын бүтээлч үйл ажиллагаа хариуцсан захирал асан Крис Бейкер нар хөгжүүлжээ.

РАЛЬДИЙ.А /shuum.mn/