Шинэ iPhone нугарч тахийж байна гэсэн мэдээлэл гарсны дараа Apple компани энгийн хэрэглээний үед тийм гэмтэл гарах нь маш ховор гэж мэдэгдлээ. iPhone 6 авсан хэд хэдэн хэрэглэгч утсаа өмднийхөө халаасанд хийж явсны дараа хэлбэр нь алдагдаж буй талаар гомдол гаргасныг олон улсын хэвлэл мэдээллийн агентлагууд мэдээлсэн юм. LG, HTC болон Samsung зэрэг Apple-ийн өрсөлдөгч ч хэрэглэгчдийн энэхүү гомдлын талаар олон нийтэд мэдээлэл түгээхэд "туслахаас" татгалзаагүй байна. Харин Apple-ийн мэдээлснээр 9 хэрэглэгч iPhone 6 утас нь тахийсан талаар гомдол гаргажээ.

Технологийн салбарт тэргүүлэгч компаниудын нэг Apple шинэ утасныхаа бат бөх чанар, эдэлгээнд анхаарч, маш өндөр чанарын материал сонгосон, хамгийн их даралт учрах хэсэгт зэвэрдэггүй ган, титан, бусад хэсэгт анодын боловсруулалтад оруулсан хөнгөн цагаан ашигласан гэж мэдэгдээд байна. Ямартай ч iPhone нугарч тахийсан талаарх мэдээлэл интернэтэд тавигдсаны дараа Apple-ийн хувьцааны ханш унаад байна. Үүнээс гадна iPhone 6 авсан хэрэглэгчид  iOS 8-ийн шинэчлэлээс болж дуудлага хийх, дуудлага хүлээн авах боломжгүй болсон талаар гомдол гаргасны хариуд компани шинэчлэлийг эргүүлэн татаад байгаа юм.

РАЛЬДИЙ.А /shuum.mn/