Монголын орчин цагийн хөгжмийн урлагт шинэ дуу хоолой, өнгө төрх болж чадахуйц “Асур” хамтлагийг “Нэгүн” студи танилцууллаа.

Тус хамтлаг 2013 оны наймдугаар сард “Нэгүн” студийн дэргэд байгуулжээ. Гурван гишүүнтэй бөгөөд поп, R&B, dance чиглэлээр уран бүтээлээ туурвидаг. Хамтлагийн ерөнхий продюсерээр “Нэгүн” студийн захирал, хөгжмийн зохиолч Б.Одбаяр болон бусад мэргэжлийн багийг бүрдүүлэн ажиллаж байна.

Тус хамтлагийн нэр Асур нь өнгөрсөн цагт амьдралын хүчний эзэн хэмээх утгыг агуулах бөгөөд тэнгэрийн их хүчийг бэлгэдэн өгчээ. “Асур” хамтлагийн ахлагч нь Мөнхлэй, гишүүдээр Гэрлээ, Санаа нар байдаг.

Тус хамтлаг анхны уран бүтээл болох “Another” дуугаа өнгөрсөн тавдугаар сард цацжээ. Энэ дуу нь Германы www.olje.de хэмээх сайтад хайрын шилдэг 100 дууны 25-д бичигдсэн амжилтыг үзүүлсэн байна.

Өнөөдөр тус хамтлаг хоёр дахь уран бүтээл болох “Battery” дууны клипээ анхлан хүргэлээ. Дууны аяыг нь Оки, үгийг нь Опозит хамтлагийн реппер А.Гантулга, хөгжмийн тохируулгыг нь Дани улсын Platinium Audio студийн мэргэжилтэн Холгер Лагерфилд хийжээ.