Бүгд Найрамдах Солонгос Улсын Гадаад хэргийн дэд сайд Жу Тэ Ёоль болон түүнийг дагалдан яваа төлөөлөгчид өнөөдөр /2015.03.26/ Монгол Улсын Их Хурлын чуулган, байнгын хороодын хуралдааны танхим болон “Цахим парламент” төслийн хүрээнд иж бүрэн тоноглосон парламентын сэтгүүлчдийн өрөөтэй танилцлаа. Улсын Их Хурлын Тамгын газрын Ерөнхий нарийн бичгийн дарга Б.Болдбаатар ноён Жу Тэ Ёоль болон дагалдан яваа төлөөлөгчдөд  төслийн хүрээнд хийж гүйцэтгэсэн ажлуудыг нэг бүрчлэн танилцуулсан юм.

Тэрээр “2012 онд Улсын Их Хурлын Тамгын газар, Эдийн засгийн хөгжлийн яам, БНСУ-ын Олон Улсын хамтын ажиллагааны байгууллага /КОИКА/-ын хооронд байгуулсан хэлэлцээрийн протоколын дагуу БНСУ-ын Засгийн газрын 3.5 сая ам.долларын буцалтгүй тусламжаар “Цахим парламент” төслийг Улсын Их Хурал  хэрэгжүүлсэн. Төслийн хүрээнд Улсын Их Хурлын чуулганы нэгдсэн хуралдаан болон Байнгын хороодын хуралдааны танхимуудын санал хураалт, микрофоны системийг шинэчилж, LED дэлгэцээр тоноглосон.

Мөн Улсын Их Хурлын чуулганы нэгдсэн хуралдаан болон Байнгын хороодын хуралдааны танхимуудын дүрс бичлэгийн төхөөрөмжүүд болон парламентын сэтгүүлчдийн өрөөг шинэчилж, шаардлагатай техник хэрэгслээр тоноглосон. Ингэснээр Улсын Их Хурлын хуралдааны  үйл ажиллагааг сурвалжлах үйл явц олон улсын жишигт хүрсэн юм” гэлээ хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.