УИХ-ын гишүүн Ц.Оюунгэрэл, Ц.Оюунбаатар нар 2015 оны тавдугаар сарын 14-ны өдөр Эмэгтэйчүүдийн хорих ангийн үйл ажиллагаатай биечлэн танилцлаа. УИХ-ын гишүүдтэй Хорих 407 дугаар ангийн дарга, хурандаа Б.Амардорж хамтран ажилласан бөгөөд гэрийн бүрээс, монгол гутал, хөөрөгний даалин гэх мэт гар урлалын зүйлс үйлдвэрлэдэг оёдлын үйлдвэр, номын сан, амьдардаг өрөө гэх мэт бүсгүйчүүдийн өдөр тутмын амьдралтай танилцсаны дараа УИХ-ын гишүүн Ц.Оюунгэрэл “Гэр бүлийн хүчирхийлэлтэй тэмцэх тухай хууль”, “Эрүүгийн байцаан шийтгэх хууль”-д санал авахаар бүсгүйчүүдтэй уулзаж ярилцан, хууль тогтоогчдод хүргэх санал хүсэлтийг лавлаж ярилцлаа.

Нийт Монгол Улс даяар байгаа хорих ангиудын 25 номын сангийн өрөөнд ном худалдан авахад зориулсан төсөв байдаггүй гэдгийг дуулаад УИХ-ын гишүүн Ц.Оюунгэрэл өөрийн бичсэн номнуудаас нэн даруй хандивлахаа амлав. Өмнө нь УИХ-ын гишүүн Л.Болд, Ц.Оюунгэрэл нар Хүүхдийн хорих ангид ном хандивлаж байсан юм.