Айлчлалынхаа хүрээнд сайд Л.Пүрэвсүрэн Франц Улсын Гадаад хэрэг, олон улсын хөгжлийн сайд Л.Фабиустай уулзаж, хоёр талын харилцаа, хамтын ажиллагаа болон харилцан сонирхсон бусад асуудлаар санал солилцов. Уулзалтын эхэнд сайд Л.Пүрэвсүрэн, Л.Фабиус нар Монгол, Францын хооронд дипломат харилцаа тогтоосны 50 жилийн ой энэ онд тохиож буйг тэмдэглэв. Сайд Л.Фабиус өнгөрсөн хугацаанд Монгол, Францын харилцаа аялал жуулчлал, соёл зэрэг олон салбарт идэвхтэй хөгжиж ирснийг дурдаж, хоёр талын хамтын ажиллагаа эдийн засгийн агуулгаар баяжуулах өргөн бололцоо буйг тэмдэглэн хөдөө аж ахуй, сансрын технологийн өргөжүүлэх сонирхлоо илэрхийлэв.
Сайд Л.Пүрэвсүрэн Монгол, Францын харилцаа сүүлийн 50 жилээр хязгаарлагдахгүй олон зууны түүхтэйг онцлон Монгол Улсын гуравдагч хөрш Франц Улстай эдийн засгийн харилцааг өргөжүүлэх, чингэхдээ хөдөө аж ахуй, соёл, урлагийн салбарт хамтран ажиллах нөөц, бололцоог бүрэн ашиглах, хувийн хэвшлийн үйл ажиллагааг тал талаасаа дэмжин ажиллахын чухлыг тэмдэглэв. Уулзалтын үеэр Францын шилдэг үүлдрийн удмын санг Монгол Улсын үхрийн селекцид ашиглахад францын техникийн туслалцаа, мэргэжилтэн сургах, малын удмын санг хамгаалах, үр үйлдвэрлэл, мал эмнэлгийн лабораторийн багаж, тоног төхөөрөмжийг францын талаас нийлүүлэх талаар тусгайлан ярилцаж, эдгээр чиглэлд хамтран ажиллахаар тохиролцов. Сайд нар соёлын харилцаа нь Монгол, Францын харилцаанд чухал үүрэг гүйцэтгэж тэмдэглэж, киноны тухай хууль эрх зүйн байдлын талаар хамтран ажиллахаар болов.
Сайд Л.Фабиус дурдсан салбаруудад хамтын ажиллагааг дэмжихэд анхаарч ажиллахаа мэдэгдээд дипломат харилцаа тогтоосны 50 жилийн ойн хүрээнд дээд, өндөр түвшний айлчлал харилцан хэрэгжүүлэх нь чухал болохыг тэмдэглэв. Түүнчлэн францын тал НҮБ-ын Хүний эрхийн зөвлөлийн сонгуульд Монгол Улсыг дэмжихээ нотлов.
Айлчлалынхаа хүрээнд Сайд Л.Пүрэвсүрэн Францын Кино үйлдвэрийн үндэсний төвийн Ерөнхийлөгч Фредерик Бредайнтай уулзаж, хамтын ажиллагааны зарим асуудлаар санал солилцов. Уулзалтын үеэр киноны салбарт Франц Улстай хамтран ажиллах, чингэхдээ францын киноны хууль, эрх зүйн орчны талаар туршлага судлах, ирэх онд Киноны бодлогын талаар хамтран Монгол Улсад олон улсын семинар зохион байгуулахаар тохиролцов. Мөн Монголын эзэнт гүрэнд аялж, дэлхийн дахинд таниулахад чухал үүрэг гүйцэтгэсэн Гиём дэ Рубрукийн тухай “Элч” киноны талаар танилцуулав.
Монгол, Францын хооронд дипломат харилцаа тогтоосны 50 жилийн ойг тохиолдуулан Лэ Сел Сан-Клү харшид зохион байгуулсан “Монголын соёлын өдрүүд” арга хэмжээг Гадаад хэргийн сайд Л.Пүрэвсүрэн, БНФУ-ын Гадаад хэрэг, олон улсын хөгжлийн сайд Л.Фабиус нар нээж үг хэлэв. Арга хэмжээний үеэр Монголын язгуур урлагийн дээжээс толилуулав.
