Германы автомашин үйлдвэрлэгч “Фольксваген” групп АНУ болон Европд борлуулдаг дизель хөдөлгүүрт автомашиныхаа хий ялгаруулах түвшинг нууцалсан болох нь илэрсэн талаар Германы Тээврийн сайд Александр Добринт  Германы засгийн газарт мэдэгдсэн байна.

Одоогоор Германы тээврийн яам тус группын хий ялгаруулах үзүүлэлтэд муу дүн үзүүлсэн автомашины тоо Европд хичнээн байгааг тодруулахаар төлөвлөж байгаа аж. Мөн Германы “Авто Бильд” сэтгүүл пүрэв гарагийн дугаартаа Германы нэгэн төрийн бус байгууллага “Бэ-Эм-Вэ”–гийн “Икс-3”, “Икс-драйв” загварын автомашинд хий ялгаруулалт ямар түвшинд байгаад шалгалт хийхэд Европд тогтоосон түвшингээс 11 дахин их гарсан тухай мэдээлжээ.

Гэхдээ тус нийтлэлд “Бэ-Эм-Вэ”–гийн “Икс-3”, “Икс-драйв” загварын автомашинд хий ялгаруулах түвшинг буруу заадаг программ хангамж суурилуулсан эсэх талаар дурьдаагүй юм байна. Үүссэн энэ нөхцөл байдалтай холбогдуулан Германы тээврийн яам “Фольксваген” гэлтгүй бусад автомашин үйлдвэрлэгч компаниуд хий ялгаруулах тогтоосон түвшинг баримтлаж байгаа эсэхийг шалгаж үзэхээр болжээ.