Өчигдөр буюу хоёрдугаар сарын 24-ний өдөр Сонгинохайрхан дүүрэгт нэг цэцэрлэг, нэг сургууль ашиглалтад орлоо. Тус дүүргийн 8-р хорооны нутаг дэвсгэр буюу Баянхошуунд 5 бүлгийн 120 хүүхдийн хүчин чадалтай 117 дугаар цэцэрлэг улсын төсвийн 1.1 тэрбум төгрөгийн хөрөнгө оруулалтаар баригдсан бөгөөд 24 дүгээр хорооны нутаг дэвсгэр буюу Толгойтын  Баруунсалаанд 640 хүүхэд суралцах боломжтой 124 дугаар сургууль баригдаж нээлтээ хийсэн юм.

Нээлтийн ажиллагаанд Нийслэлийн Засаг даргын орлогч Л.Гантөмөр, Нийслэлийн Иргэдийн Төлөөлөгчдийн Хурлын төлөөлөгч Л.Сайнтөгс, дүүргийн Засаг даргын орлогч Н.Ганаа, Боловсролын хэлтсийн дарга М.Баяраа  болон бусад холбогдох  албаны хүмүүс оролцлоо.

Сонгинохайрхан дүүрэг нь хүн амын нягтаршил ихтэй, орон нутгаас шилжин ирэгсэд тасардаггүй учир сургууль, цэцэрлэгийн асуудал хүндрэлтэй байдаг. Ялангуяа сүүлийн жилүүдэд хотын хүн ам өсөж, хаяа тэлснээс тус дүүргийн захын хороодын иргэдэд сургууль, цэцэрлэгийн хэрэгцээ шаардлага эрс ихсээд байсан юм. Тэгвэл эдгээр сургууль,  цэцэрлэг ашиглалтад орсноор Баянхошуу, Баруунсалаа орчмын айл өрхүүдийн сургуулийн өмнөх болон сургуулийн насны хүүхдүүд тохилог, цэвэр орчинд сурч, хөгжих боломжтой болж байна. Тус дүүргээс сургууль, цэцэрлэгийн тоог цаашид нэмэгдүүлэхээр зорин ажиллаж байна гэж Сонгинохайрхан дүүргээс мэдээллээ.