Нийслэлийн Засаг дарга бөгөөд Улаанбаатар хотын Захирагч Э.Бат-Үүл өнөөдөр “Улаанбаатар Төмөр зам” хувь нийлүүлсэн нийгэмлэгийн нэгдүгээр орлогч Ушаков Александр Вениаминович тэргүүтэй төлөөлөгчдийг хүлээн авч уулзлаа.

Уулзалтын эхэнд Нийслэлийн Засаг дарга, Улаанбаатар хотын нийтийн тээврийг сүлжээг сайжруулахад хамтран ажиллаж байгаад талархал илэрхийлээд, Улаанбаатар хотын доторх тээврийн асуудлыг шийдэх нь маш чухал байгааг онцоллоо. Тэрээр “Улаанбаатар хотын 2020 хүртэл ерөнхий төлөвлөгөө, 2030 оны хөгжлийн чиг хандлагыг бид УИХ-аар хуульчлан батлуулсан. Өнгөрсөн 4 жил ерөнхий төлөвлөгөөний дагуу  хотын зам, инженерийн дэд бүцийг сайжруулахад онцгойлон анхаарч бүтээн байгуулалтыг эрчимжүүлсэн. Улаанбаатар хотын ерөнхий төлөвлөгөөнд  Налайх, Багануур, Жаргалант, Партизан зэрэг газруудыг дагуул хот болгон хөгжүүлэхээр тусгасан. Тиймээс дагуул хот болгон хөгжүүлэх газрууд руу төмөр зам тавих, шинэчлэх, хөгжүүлэх шаардлагатай байна. Та бүхнийг хот, дүүргийн зорчигч тээвэрт ашиглагдаж байгаа төмөр замыг шинэчлэх ажилд хамтран ажиллахыг хүсэж байна” гэлээ.  Мөн Хөшигийн хөндийд баригдаж байгаа олон улсын шинэ нисэх онгоцны буудал хүртэл төмөр замын маршрут гаргаж төмөр зам дагуу хөгжлийн коридор үүсгэх төслийг дэмжин хамтран ажиллахыг хүсэв.

Улаанбаатар төмөр замын зүгээс энэ асуудлыг дэмжин хамтран ажиллах боломжтой байгаагаа илэрхийлсэн бөгөөд цаашид талууд хамтарсан төслийн нэгж байгуулан ажлаа эхлүүлэхээр тохиролцов гэж Нийслэлийн ЗДТГ-ын Хэвлэл мэдэлэл, олон нийттэй харилцах хэлтсээс мэдээллээ.