Хятадын хамгийн алдартай спортын од, сагсан бөмбөгийн домог, 31 настай Яао Мин зодог тайлснаа зарласнаас хэдэн сарын дараа их сургуульд элсэн оржээ. 
"Багш өршөөл үзүүлж, надад гэрийн даалгавар өгөөгүй" хэмээн Яао Шанхай хотын Жиао Тон их сургууль дээр эхний өдрөө хичээлд суусныхаа дараа сэтгүүлч нарт ярьсан байна.
Хьюстон Рокетс багт тоглож байсан 2.3 метр өндөртэй тамирчин эдийн засгийн чиглэлээр сурч байгаа гэнэ.
Бараг жилийн турш хөлийн бэртлээс болж тоглолтонд оролцож чадаагүй тэрээр долдугаар сард зодог тайлсан юм. Тухайн үед Яао Хятадын Shanghai Sharks багийн ерөнхий менежерээр ажиллаж магадгүй тухайгаа хэлж байжээ. Гэхдээ даваа гаригт тэрээр хэвлэлийн хурал дээр их сургуульд элссэн эхний өдрийнхөө тухай ярьсан байна.
Тэрээр "Би ямар нэг сургуульд сураагүй 10 гаруй жил болсон байна, тиймээс эхэндээ бага зэрэг хэцүү байна, сургуулийн амьдралд дасан зохицоход надад бага зэрэг хугацаа хэрэгтэй байна" гэж ярьжээ.
NBA дэх хамгийн алдартай Ази тоглогч Яао бэртлээс болж 2009-2010 оны улиралд тоглолтоос өнжсөн юм.
Э.АМАР