Монголын Сэтгүүлчдийн Нэгдсэн Эвлэлийн мэдэгдэл
Сэтгүүлч А.Баатархуяг, Г.Уян­га нарт холбогдох хэргийг хянах Сүхбаатар дүүргийн анхан шатны шүүх хурал болж, тэдэнд 12 сая төгрөгийн торгууль ногдуулжээ. Монгол Улсын Байгаль орчин, аялал жуулчлалын сайд Л.Гансүх “Сая ам.долларын байшинд амьдар­даг” гэж сэтгүүлч А.Баатархуяг “Нэгдлээс задрал руу” нийтлэлдээ бичиж, түүний эхнэр сэтгүүлч Г.Уянга уг баримтыг “Ард түмний их хуралдай”-д үг хэлэхдээ дав­тан сануулсныхаа төлөө ингэж Эрүүгийн байцаан шийтгэх хуу­лийн 111-ийн 2-оор яллууллаа. Жирийн сэтгүүлч, төрийн сайд хоё­рын хооронд бүтэн жил найман сарын турш үргэлжилсэн маргаан мэтгэлцээн ийнхүү сэтгүүлчдийн “ялагдал”-аар өндөрлөж байгаа нь нийт сэтгүүлчид төдийгүй цөөнгүй уншигч, үзэгч, сонсогчдын гайхал зэвүүцлийг зүй ёсоор төрүүлж байна.
Монголын ард түмэн төр зас­гийн үйл ажиллагаа, түүний өн­дөр дээд албан тушаалтнуудын талаар байнгын мэдээлэл авах эрхтэй. Монголын сэтгүүлчид, хэвлэл мэдээллийн хэрэгслүүд эл хэрэгцээг ханган үйлчилж, эрэн сурвалжлах сэтгүүл зүйн хурц үзүүр түүнд чиглэж байдаг билээ.
Сэтгүүлч А.Баатархуяг, Г.Уянга нар нь мөшгөх сэтгүүл зүйн хар­дах эрхээ эдэлж Л.Гансүх сайд яагаад сая ам.долларын байшинд сууж байна вэ? Энэ мөнгийг хаанаас, хэнээс ямар замаар олж авав гэд­гийг хөндөж анхааруулан сэрэмж­лүүлж бичсэн. Шүүхийн танхимаас сурвалжлагчдад өгсөн тэдний ярилцлагаас үзэхэд “Өөрсдийгөө хангалттай баримтаар хамгаал­сан” гэжээ. Гэтэл яагаад 12 сая төг­рөгийн торгууль ногдуулав. Шүүх засаглал хэний талд үйл­чилж бай­на гэсэн асуулт нийгмийн сэтгэхүйд хариултгүй үлдэж бай­гаад Монголын Сэтгүүлчдийн Нэгд­сэн Эвлэл туйлаас харамсаж байна.
Анхан шатны шүүхээс өөрсдөд нь ногдуулсан 12 сая төгрөгийн торгуулийг үндэслэлгүй гэж үзэж дараагийн шатны шүүхэд давж заалдахаа сэтгүүлч А.Баатархуяг, Г.Уянга нар мэдэгдсэн. Тэдний үнэнийг эрж хайж, олж тодруулах гэсэн шударга тэмцлийг Мон­голын Сэтгүүлчдийн Нэгдсэн Эвлэл дэм­жиж эв санааны нэгдэлтэй бай­гаагаа илэрхийлж байна.
Монголын шүүх засаглал нэр бүхий хоёр сэтгүүлчид ногдуулсан дээрх шийдвэрээ эргэн харж хэнээс ч хараат бус, шударга үнэний жинхэнэ манаач мөн гэдгээ ард түмэндээ харуулна гэдэгт бид гүнээ итгэж байна.
Монголын Сэтгүүлчдийн Нэгд­сэн Эвлэл ардчилсан Монгол Ул­сад чөлөөт хэвлэлийг хөгжүү­лэхийн тулд тэргүүн ээлжинд эрэн сурвалжлах сэтгүүл зүйг хөгжүүлэх ёстой. Ингэх нь ардчиллын үнэт зүйлсийг хамгаалж үлдэх найд­вартай баталгаа мөн гэж үзэж бай­гаагаа тов тодорхой мэдэгдэж байна.