"Скай Резорт" цанын бааз гурав дахь цанын улирлаа 11 дүгээр сарын 26-нд нээхээр болжээ. Цаг агаарын байдлаас шалтгаалж цанын баазыг энэ жил харьцангуй орой нээж байгаа хэдий ч олон шинэ бүтээгдэхүүн, үйлчилгээг нэвтрүүлжээ.
      Тухайлбал, техник, технологийн хувьд Монголд анх удаа "СМАРТ ГЕЙТ"  бүрэн автомат системд шилжихээр энэ улирлаас туршиж эхлэх юм байна. Энэ систем нь үйчлүүлэгчид цаасан билет хэрэглэхгүй, бүх мэдээллээ электрон бугуйвчинд оруулж үйлчилгээгээ авна. Давуу тал нь тухайн хэрэглэгч зөвхөн эхний удаа ирээд хувийн дэлгэрэнгүй мэдээллээ оруулснаар дараа дахин үйлчлүүлэхдээ өндөр, гутлын размер зэргээ давтаж бүртгүүлж цаг алдахгүй зөвхөн нэрээ хэлэхэд бүртгэлийн баазаас мэдээлэл нь шууд татагдаж үйлчилгээгээ авахаас гадна байнгын гулгагчид энэ давтамжаараа төрөл бүрийн урамшуулалд хамрагдах, үйлчилгээг түргэн шуурхай авах юм. Мөн гадаа удаан дугаарлаж зогсохгүй. Цаашдаа утаснаасаа юм уу онлайнаар захиалгаа хийдэг, хаанаас ч үйлчилгээг авдаг, өөрийгөө бүртгүүлдэг гээд хязгааргүй боломжууд нээгдэх гэнэ.
      Үйлчилгээний үнийн хувьд нэмээгүй, харин ч нөгөө талаасаа анх удаа цанаар гулгаж байгаа хүмүүст цанын багш нараар аюулгүй унах, эргэх, хурдаа сааруулах гэх зэрэг анхан шатны зайлшгүй сурах техникүүдийг үнэ төлбөргүй заалгах боломжтой ажээ. Ганц нэгээрээ, гэр бүлээрээ тухайлсан сургалт авбал урьдын адил үнээр үйлчлэх гэнэ. Гэхдээ энэ боломж зөвхөн энэ улиралд барьж байгаа цанын баазын бэлэг аж.
      Тус бааз гүйлтийн цанын замаа илүү сонирхолтой байдлаар засч уртасгах, хэрэглэгчдээ зориулж ресторанаа иж бүрэн шинэчлэх, өндөр зэрэглэлийн үйлчилгээг авахыг хүссэн хүмүүст зориулсан VIP lounge-той болсон гээд томоохон нэмэлт бүтээн байгуулалтыг хийсэн болохоо баазын хамт олон онцолж байна.