Нийслэлийн Аялал жуулчлалын газар, Соёлын яам, Монголын Морьт Харваачдын Холбоотой хамтран 2023 оны есдүгээр сарын 1-10-ны өдрүүдэд “Хийморь” морьт харвааны олон улсын нээлттэй наадам болон Олон улсын Морьт харвааны холбооны /IHAA/ Дэлхийн аварга шалгаруулах тэмцээнийг зохион байгуулах гэж байна.

Аялал жуулчлалын шинэ бүтээгдэхүүн бий болгох, тусгай сонирхлын аялал жуулчлалыг хөгжүүлэх, үндэсний ёс зан заншил, өв уламжлалаар дамжуулан гадаад, дотоодын жуулчдад Улаанбаатар хотыг сурталчлах зорилготой “Хийморь” олон улсын морьт харвааны тэмцээнийг 2019 оноос эхлэн зохион байгуулж ирсэн бөгөөд энэ жил Монгол Улс анх удаа Дэлхийн аварга шалгаруулах тэмцээнийг хүлээн авч байна.

Мөн Монгол бөмбөг намнаа төрөл нь энэ удаагийн дэлхийн аварга шалгаруулах тэмцээнд албан ёсны төрөл болон шинээр нэмэгдэж байгаагаараа онцлог юм.

Энэ удаагийн Дэлхийн аварга шалгаруулах тэмцээнд БНХАУ, Өмнөд Солонгос, АНУ, Франц, Австрали, Канад, Герман, Унгар зэрэг дэлхийн 24 орны 80 гаруй тамирчин Скермиш буюу Түрэг харваа, Тавер буюу Унгар харваа, Польш харваа, Рэйд буюу Ази харваа, Монгол бөмбөг намнаа зэрэг таван төрөлд хурд хүч, цэц мэргэнээ сорино.

 Энэ хүрээнд зохион байгуулагдах тэмцээн уралдааныг хүргэж байна. Үүнд:

• 2023.09.01- 2023.09.03 өдрүүдэд “Хийморь” морьт харвааны олон улсын наадам Чингис хааны хүрээ аялал жуулчлалын цогцолборт
• 2023.09.06- 2023.09.08 өдрүүдэд “Хийморь” Дэлхийн аварга шалгаруулах тэмцээн “Чингис хааны хүрээ” аялал жуулчлалын цогцолборт
• 2023.09.09 өдөр Үзүүлэх тоглолт Жанжин Д.Сүхбаатарын талбайд
• 2023.09.10 ДАШТ-ээс шалгарсан тамирчид Монголын үндэсний уламжлалт харваа болох “Бөмбөг намнаа" төрөлд өрсөлдөж, шилдгээ шалгаруулна гэж Нийслэлийн Аялал жуулчлалын газраас мэдээллээ.