Энэ талаарх мате­риа­лыг Хятадын Чунцин хотын орлогч дарга асан Ван Лицзюн Чэндү хот дахь Аме­рикийн Элчин сайдын яаманд дамжуулжээ. Тэр­бээр АНУ-ын Элчин сай­дын яаманд бүтэн хоногийг өнгөрүүлсэн бөгөөд одоо түүний хаана байгааг хэн ч мэдэхгүй гэнэ. Харин Хя­тадын хилийн чанадад хятад хэлээр гардаг “Босюн” сайт “Ван Лицзюнь одоо Бээ­жинд байгаа. Түүнийг мөр­дөж эхэл­сэн” хэмээн мэдээл­жээ.
“The Washington Times” сонины Үндэсний аюулгүй бай­д­лын шинжээч Билл Гертц “Ван Лицзюнь мөн Хятадын Коммунист намын өндөр албан тушаалтай түшмэд авлигад холбогдсон талаарх материалыг өгсөн” хэмээн тус сонины дагуул хэвлэл “Washington Free Beacon”-д бичжээ.  Түүнчлэн Чунцин хотын намын хорооны тэргүүлэгч Бо Силай болон Коммунист намын Төв Хорооны байнгын хорооны гишүүн Жоу Юнкан нар “хатуу бодлого”-ыг дэм­жигч­дийн хамт Си Цзиньпинийг энэ намар улс орны удирд­лагыг хүлээн авахад саад хийж, улмаар түүнийг зай­луулахаар төлөвлөсөн гэнэ.
Нэрээ хэлэхийг хүсээ­гүй америк түшмэл “Ван Лицзюнь Америкаас улс­төрийн орогнол хүссэн ч Цагаан ордон болон зохих бай­гуул­лагууд Хятадыг гом­доохоос айж, зөв­шөө­рөө­гүй” хэмээжээ. Харин АНУ-ын Конгрессийн ги­шүүн Дана Рорабахер “Ван Лицзюнь оргох оролд­лого бүт­вэл Хятадын Засгийн газрын талаар нууц мэдээл­лийг АНУ-ын тусгай албадад өгч магадгүй” гэж ярилаа.
Хуйвалдагчид төлөв­лө­гөө­гөө Хятадын Хаврын баярын дараах­наас хэрэг­жүүлэх гэж байсан аж. Энэ талаар Хонконгийн хэвлэл мэдээл­лийнхэн “Хятадын Ком­мунист намын Төв хорооны байн­гын зөвлөлийн есөн гишүүн санал нэгтэйгээр Бо Силайн хэргийг мөрдөх тусгай бүлэг байгуулахаар болсон” хэмээн мэдэээлэв.
Дашрамд сонордуулахад дэлхийн 10 гаруй орон Бо Силай, Жоу Юнкан, Ван Лицзюн, Зян Зэминь нарыг “Фалуньгун” оюуны сур­гаал баримтлагчдыг хавчин хя­хаж, хоморголон устгадаг хэмээн буруутгаж, шүүхэд өгсөн юм байна.

Өглөөний сонин