Монголын кино урлагийн салбарын хөгжил дэвшил, ололт амжилтыг үзэгчдэд таниулж сурталчилсан «Улаанбаатар» кино наадам ирэх тавдугаар сарын 12-нд болно.

Тус наадамд нэр дэвших бүтээлүүдийг тавдугаар сарын нэгэн хүртэл хүлээн авах юм.

«Улаанбаатар» кино наадмаар «Шилдэг кино», «Шилдэг эрэгтэй, эмэгтэй гол дүрийн жүжигчин», «Шилдэг эрэгтэй эмэгтэй туслах дүрийн жүжигчин», «Шилдэг найруулагч», «Шилдэг зураглаач», «Шилдэг дэбют кино», «Шилдэг хөрөнгө оруулагч», «Үзэгчдийн таашаал хүртсэн шилдэг кино» зэрэг 20 төрлөөр ялагчийг тодруулна.

Энэ жилийн «Улаанбаатар» кино наадмын Академийн шагнал гардуулах ёслолд «Бодлын хулгайч» кино хамгийн олон төрөлд нэр дэвших магадлалтай байгаа аж.

Дашрамд сонирхуулахад, өнгөрсөн онд анх удаа зохион байгуулсан «Улаанбаатар» кино наадамд нийт 34 кино нэр дэвшсэн бөгөөд 19 номинациар шилдгүүдээ тодруулж байсан юм.