ХЗДХ-ийн сайд Ц.Нямдорж, УИХ-ын гишүүн Х.Баттулга хоёрын хооронд шуугиан тарьсан маргаан дэгдээд байгаа билээ. Энэ бол хоёр хүний хоорондох хов живийн асуудал биш бөгөөд улс орны амин чухал асуудлыг хөндсөн учраас олны анхаарлыг зүй ёсоор татаад байна. ХЗДХ-ийн сайд Ц.Нямдорж Х.Баттулгын телевизэд өгсөн ярилцлагын хариу болгож хийсэн хэвлэлийн бага хурлын үеэр түүний талаар нэлээд ноцтой баримт дэлгэсэн юм. Х.Баттулга ЗТБХБ-ын сайдаар ажиллаж байхдаа төмөр зам барих, “100 мянган айлын орон сууц хөтөлбөр” зэрэг салбарынхаа голлох үйл ажиллагаанд албан тушаалын давуу эрх эдэлж, гар доорхи хүмүүсээрээ дамжуулан улс оронд хохирол учруулахуйц үйл ажиллагаа явуулжээ. Эхнийх нь Солонгосын хамтарсан групптэй төмөр зам байгуулах нууц гэрээ үйлдсэн явдал юм.
Одоогоос яг жилийн өмнө буюу гуравдугаар сарын 19-нд Солонгосын хамтарсан групптэй төмөр зам барих нууц гэрээ байгуулах үйл ажиллагаанд Монголын талаас “Монголын төмөр зам” компанийн захирал Б.Батзаяа гэдэг хүн оролцсон байна. Энэ хүний БНСУ уруу явж гэрээ байгуулсан үеийн зураг, мэдээ нь интернэтэд хүртэл тавигджээ. Харин энэ тухай ноён Х.Баттулга “Тийм юм болоогүй. Ташаа мэдээлэл” гэж хэлж байгаа боловч үнэн хэрэг дээрээ тэрхүү 20 хуудас гэрээг үйлдсэн нь яруу тодоор батлагдаж байна. Харамсалтай нь, энэ гэрээг Засгийн газар ч, салбарын яам нь ч, Төмөр замын хэрэг эрхлэх газар ч мэдээгүй бөгөөд ар хударгаар нь үйлдэгдчихсэн хэрэг.
Хэрвээ энэ гэрээ хууль ёсны агаад зохих шаардлагыг хангасан л юм бол ийм нууц байдлаар хийгдэх ёсгүй. Ийм их хэмжээний хөрөнгө шаардагдах төслийг огт тендер зарлалгүйгээр хийх эрх сайдад байхгүй. Учир нь энэхүү 20 хуудас гэрээнд “Чойбалсан хүртэлх 1100 км төмөр зам тавина. Нэг км төмөр замын өртөг нь 2.1-2.5 сая ам.доллар байна. Нийт 1100 км төмөр зам тавибал 2.1-2.5 тэрбум ам.доллар зарцуулна” гэсэн тооцоо хийгджээ. 2.5 тэрбум ам.доллар бол их хэмжээний мөнгө. Гэтэл мань сайд уг гэрээг Засгийн газар, салбарын яамандаа ч мэдэгдэлгүй хав дарсан байх юм. Хамгийн сонирхолтой нь, гэрээ байгуулж Монголын талаас оролцсон Б.Батзаяа нь Х.Баттулгын бие хамгаалагч залуу гэнэ. / Цахим хуудаст тавигдсан зурагтай мэдээллийг Та бүхэнд бүрэн эхээр нь хүргэж байна/.
Тэрбээр одоо МоАХ-нд сүүлийн үед ихээхэн хөдөлгөөнд ороод байгаа хэсэг залуусыг идэвхийлэн толгойлогч . Үүгээр ч зогсохгүй тэрхүү нууц гэрээнд Чойбалсан чиглэлийн төсөл амжилттай хэрэгжвэл хоёрдугаар ээлжинд Гашуун сухайт, Нарийн сухайт чиглэлд төмөр зам тавина гэж заасан байж. Хэрвээ тэдний хүссэнчлэн гэрээнд заасны дагуу ажил явагдвал Гашуун сухайт, Нарийн сухайт руу тавих төмөр замын ажил бүтэлгүй тийшээгээ хандах нь ойлгомжтой юм.