Монгол Улсын Ерөнхийлөгч Ц.Элбэгдорж Бүгд найрамдах Киргиз улсын Ерөнхийлөгч Алмазбек Атамбаевын урилгаар Киргиз улсад албан ёсны айлчлал хийх гэж буй.

Тэрбээр өнөөдөр тус улсыг зорих бөгөөд албан ёсны айлчлал энэ сарын 9-нд өндөрлөх ажээ. Айлчлалын үеэр Ерөнхийлөгч Ц.Элбэгдорж, А.Атамбаев нар албан ёсны хэлэлцээ хийх юм. Мөн Киргизийн Жогорку Кенеш /парламент/-ийн дарга А.Жээнбеков, Ерөнхий сайд О.Бабанов нар Монгол Улсын Ерөнхийлөгчид бараалхах ажээ.

Ерөнхийлөгчийн айлчлалын хөтөлбөрт Киргизийн парламентын хүндэтгэлийн хуралдаанд үг хэлэх, нэрт философич Ж.Баласагыны нэрэмжит Киргизийн үндэсний их сургуулийн оюутнуудтай уулзах зэрэг ажлууд багтаж байгаа ажээ. Айлчлалын хүрээнд Монгол, Киргизийн бизнес уулзалт болох юм.