Франц Улсын Монтронд Лесбайнс хотод жил бүр зохион байгуулдаг «Залуу авьяастнууд 2012» фестиваль өнгөрсөн гуравдугаар сарын 14-нөөс дөрөвдүгээр сарын 1-нд болж монгол хүүхдүүд медалийн хур буулгажээ.
Уг фестивальд Франц, Герман, ОХУ, Япон, Хятад, Испани зэрэг улсын шүүгчид шүүж, 200 гаруй төгөлдөр хуурчид авьяасаа сорив.
Мэргэжлийн төгөлдөр хуурчдын энэ тэмцээнд Монголоос Франц улсын Лион хотын консерватурын II курсын оюутан Б.Анударь ахлах ангилалд нь оролцож III байрт шалгарлаа.
Фестиваль мэргэжлийн болон сонирхогчийн гэсэн хоёр чиглэлээр зохион байгуулсан юм.
Төгөлдөр хуурчдын сонирхогчдын тэмцээнд 5-17 насны 70 гаруй хүүхэд оролцсоноос Монгол Улсаас оролцсон 17 хүүхэд ангилал тус бүрт I, II, III байр эзлэсэн байна.
Бага насны сонирхогчдын тэмцээнд оролцсон монгол хүүхдүүд бусад орны оролцогчдоос онцгой ялгарсан нь нот харалгүй 100 хувь тоглолтын гүйцэтгэлээ чадварлаг хийж үзэгчдийг гайхшрууллаа.
Францад болон олон улсын фестивальд Монгол Улсаа төлөөлөн оролцож шагнал авсан хүүхдүүдийг танилцуулахад, I байрт О.Амина, С.Ирмүүн, Ж.Уянга, С.Номуун-Эрдэнэ, Б.Тэнгис, М.Анужин, II байрт Б.Чанга, Б.Хатангарав, П.Тэмүүл, Д.Тэргэл, Г.Нямжаргал, Х.Хангал, Н.Мишээл, Б.Батчансаа, Э.Мишээл, III байрт Э.Цэлмүүн, Б.Мичидмаа нар бусад олон орны төгөлдөр хуурчдыг манлайллаа.
Мэргэжлийн өндөр түвшинд сургаж, авьяасыг нь тодруулсан Урлагийн «Дэм» нийгэмлэгийн дэргэдэх «Хөгжмийн авьяастан-Төгөлдөр хуур» сургалтын төвийн захирал, СТА Д.Наранцацрал, багш, СТА Б.Одгэрэл нарт болон тус сургалтын төвийн хамт олонд медаль хүртсэн хүүхдүүд болон эцэг, эхчүүдийн өмнөөс талархал дэвшүүлж байна.
МОНЦАМЭ
