Ерөнхийлөгч Н.Энхбаяр Ганц худагт хоригдож, түүнтэй уулзсан өмгөөлөгчийг нь хүртэл Шүүхийн шийдвэр гүйцэтгэлийнхэн нэгжиж, захидлуудыг нь хурааж авч байгаа. МУ-ын гуравдахь Ерөнхийлөгч шоронд хоригдож байгаа тухай мэдээлэл дэлхий даяар цацагдаж байна. Гэвч Н.Энхбаярын үүсгэн байгуулсан МАХН-ынхан энэ их дуулианыг ашиглаж, намынхаа гишүүдийн тоог нэмэх, улс төрчдийг өөртөө татах, хэдхэн хоногийн дараа эхлэх сонгуулийн ажилд бэлтгэх гээд тун завгүй байгаа сурагтай. Экс тэргүүн хатагтай О.Цолмон “Би нөхрөө магтаж байгаа юм биш. Ямар ч байсан миний нөхөр монголын төлөө хамгийн их зүйлийг хийсэн. Та нар бүх Ерөнхийлөгч, Ерөнхий сайд нарын хийсэн ажлыг жагсааж байгаад хараарай. Бүх хүнийг өрөөс салгасан. Гэрт орж ирээд баривчлаад явсан залуусыг ээжтэй,  аавтай нь өрнөөс салгасан хүн шүү дээ. Миний нөхрийг сүүлийн гурван жил шалгаж байна. Манай хүн хуулийнхан дуудахад ажлаа хийж байна гэж үнэмшээд өнгөрсөн жил хоёр удаа мэдүүлэг өгсөн. Тайлбар ч өгсөн. Харин сүүлд хилс хэрэг болж хувирсан. Миний элэнц өвөө хилс хэргээр амиа алдсан. Н.Энхбаярыг шалгаж байгаа загвар нь яг тийм хэлмэгдүүлэлт шиг байсан. Тэгээд хилс хэрэг юм бол  өөрөө өөрийнхөө эсрэг мэдүүлэг өгөх шаардлагагүй гэж үзсэн.  Долдугаар сарын 1-тэй  холбоотой баримт материалаас гадна сонгуулийн луйвар хийсэн баримтыг дэлгэнэ гэсэн. Тэгээд л ийм юм боллоо. Хэлмэгдүүлэлт хэзээ ч дуусдаггүй. Надад уйлах ч зав өгөхгүй байна. Энхбаярыг өмөөрөх гэсэндээ биш. Ийм хэлмэгдүүлэлт  Монголд байж болохгүй. Хэлмэгдүүлэлт эхлүүлсэн хүн өөрсдөө тэр зүйлдээ ороогддог” хэмээн нилээд шазруухан мэдэгдээд байгаа. Тэр ч бүү хэл МУ-ын гурав дахь тэргүүн хатагтай О.Цолмон сүүлийн үед намын ажилд гар бие оролцож, хэнийг хаана нэр дэвшүүлэхээ нарийн тооцоолж, бас Н.Удвалтай байн байн санал зөрөх болжээ. О.Цолмон хатагтай нөхрийг нь шорон руу түлхээд байгаа улс төрийн бохир тоглоомоос татгалзаж гарахыг огтхон ч хүсэхгүй байна. Тэрбээр өөрийнхөө том хүү Э.Батшугарыг сонгуульд сойхоор бэлтгэж эхэлжээ.   Н.Энхбаярын том хүү Батшугар 1987 онд төрсөн. Гадаадад боловсрол эзэмшиж, АНУ-ын Бентлигийн их сургуульд  магистрын зэрэг хамгаалсан гэнэ. Сүүлд 2010 оны сүүлээр Монголд ирсэн бөгөөд  “Ремиф” компанийн захирлын алба хашдаг аж. Уул уурхайн төслүүдэд хөрөнгө оруулалт хийж, чамлахааргүй хөрөнгө мөнгө цуглуулсан  “Ремиф” ХХК-ийн нэр  Н.Энхбаярын шамшигдуулсан, үрсэн, хувьдаа завшсан гэх олон хэргүүдтэй нэр холбогдож явдаг. Сүхбаатар дүүргийн наймдугаар хорооны нутаг дэвсгэрт үйл ажиллагаа явуулдаг “Ремиф” компаниас болж . Э.Батшугарыг АТГ-ынхан шалгаж эхлээд байгаа. Гэвч эрх баригчид аавынх нь араас хүүг нь дахин үймээн самуун дэгдээж, хөл нүцгэн чирч, гулдарч баривчилж чадахгүй. Хэрвээ тэгэх юм бол  айж сандарсан иргэд яаж ч бухимдаж магадгүй гэдгийг О.Цолмон хатагтай нарийн тооцоолжээ. Ирэх 2012 оны УИХ-ын сонгуульд Э.Батшугар, МАХН-ын дэд дарга, УИХ-ын гишүүн Д.Тэрбишдагвыг дагаж, Архангай аймагт, аавынхаа нутгаас нэр дэвшихээр төлөвлөж байгаа гэнэ. Д.Тэрбишдагва гэдэг Германаас гутал оймс зөөдөг, жирийн нэг бизнесмен эрийг Н.Энхбаяр Германд элчин сайдаар томилж, дараа нь Хүнс хөдөө аж ахуйн сайдын суудалд залж, УИХ-ын гишүүн болгож байлаа. Тиймээс тэр хүн Н.Энхбаярт өртэй. Хүүг нь улс төрд дагуулах, эзэнгүй хойгуур нь эхнэр хүүхэд, намыг нь тэтгэх үүрэгтэй гэдэг нь хэнд ч ойлгомжтой.
www.shudarga.mn