Монгол Улсын Зэвсэгт хүчин энхийг дэмжих ажиллагаанд оролцож эхэлсний 10 жилийн ойд зориулан Монгол цэргийн музейгээс "Монгол улс энхийн үйлсэд" олон сонирхолтой баримт, үзмэр бүхий үзэсгэлэнг үзэгч түмэндээ дэлгэн толилуулаад байна.  Энэхүү үзэсгэлэнд Монгол Улс энхийг дэмжих 14 ажиллагаанд оролцсоныг үзүүлэх 7000 гаруй гэрэл зураг бүхий долоог дижитал альбом, ажиллагааны тоо баримт, мэдээлэл бүхий мэдрэгч дэлгэц, Ирак, Афганистан, Косово,Сьерра-Леон, Чад, Судан Улсад үүрэг гүйцэтгэсэн цэргийн багуудын туг, дүрэмт хувцас, ном, альбом, Ирак Улсад амиа золиослогчийн дайралтаас олон мянган цэргийн алба хаагчийн амийг аварсан дэд ахлагч Г.Аззаяа, "Иракийн эрх чөлөө" ажиллагааны II ээлжийн багийн захирагч бригадын генерал Д.Баярсайхан, хошууч генерал Б.Баярмагнай нарын хувцас хэрэглэлийг дэлгэн тавьжээ. Мөн Афганистаны үндэсний армийн хурандаагийн дүрэмт хувцас, Сьерра-Леон Улсад үүрэг гүйцэтгэсэн цэргийн багийн ажиллагааны газрын макет, дэлбэрсэн мина, сумны хонгио, энхийг дэмжих ажиллагаанд цэрэг дайчдын дурсгалын медалиуд болон ХЦУГ, ЦЕГ, ТЕГ, Дотоодын цэргийн штаб, ТТАХНЭ-ийн үүрэг гүйцэтгэсэн цэргийн багийн дурсгалын эд зүйл зэрэг 50 гаруй биет үзмэрийг ч тавьсан байна.
 Уг үзэсгэлэнгийн тайлбарыг аудио хөтөчөөр сонсох боломжтой бөгөөд үзэгчид энхийг дэмжих ажиллагаанд үүрэг гүйцэтгэхэд өмсдөг иж бүрэн дүрэмт хувцас, хэрэглэлийг өмсөж дурсгалын зураг татуулах боломжтой.

Д.Өлзий
Эх сурвалж: "Монцамэ"